புது தில்லி, ஏப்ரல் 16, 2026: உலக ஊக்கமருந்து தடுப்பு முகமையின் (WADA) உலகளாவிய ஊக்கமருந்து எதிர்ப்பு புலனாய்வு மற்றும் விசாரணை வலையமைப்பின் (GAIIN) இறுதி மாநாட்டின் தொடக்க விழாவில், மத்திய இளைஞர் விவகாரங்கள் மற்றும் விளையாட்டுத் துறை அமைச்சர் டாக்டர் மன்சுக் மாண்டவியா உரையாற்றினார். அப்போது, தூய்மையான விளையாட்டு மற்றும் ஊக்கமருந்தை எதிர்த்துப் போராடுவதில் உலகளாவிய ஒத்துழைப்புக்கான இந்தியாவின் வலுவான அர்ப்பணிப்பை அவர் எடுத்துரைத்தார்.
சர்வதேச ஒத்துழைப்பின் முக்கியத்துவத்தை எடுத்துரைத்த அமைச்சர், “இந்த முக்கியமான துறைகளில் ஒத்துழைப்பை வலுப்படுத்துவதில், ஒரு உலகளாவிய ஊக்கமருந்து எதிர்ப்புப் புலனாய்வு மற்றும் விசாரணை வலையமைப்பு முக்கியப் பங்காற்ற முடியும்” என்று கூறினார். மேலும், ஊக்கமருந்துக்கு எதிரான உலகளாவிய போராட்டத்தில் முக்கியப் பங்குதாரர்களை இந்த மாநாடு ஒன்றிணைக்கிறது என்றும் அவர் குறிப்பிட்டார்.
கூட்டத்தில் உரையாற்றிய டாக்டர் மாண்டவியா, இந்தியா “வெறும் விதிமுறைகளுக்கு இணங்குவதற்காக மட்டுமல்ல, விளையாட்டின் நேர்மை மீதான உண்மையான அர்ப்பணிப்புடனேயே” முன்முயற்சியான சீர்திருத்தங்களை மேற்கொண்டுள்ளது என்பதை எடுத்துரைத்தார்.
2022-ஆம் ஆண்டின் தேசிய ஊக்கமருந்து தடுப்புச் சட்டத்தை ஒரு வலுவான சட்டக் கட்டமைப்பாக அவர் சுட்டிக்காட்டியதோடு, 2025-ஆம் ஆண்டின் தேசிய ஊக்கமருந்து தடுப்புத் திருத்தச் சட்டம் இந்தியாவின் விதிமுறைகளை உலகத் தரங்களுடன் சீரமைக்கிறது என்றும் குறிப்பிட்டார்.
தடைசெய்யப்பட்ட பொருட்களை வழங்குதல் அல்லது கடத்துதலில் ஈடுபடுவோருக்கு எதிராக குற்றவியல் சட்டப் பிரிவுகளை அறிமுகப்படுத்துவதற்கான பணிகளில் அரசாங்கம் ஈடுபட்டு வருவதாக டாக்டர் மண்டாவியா தெரிவித்தார்.
முந்தைய முயற்சிகள் பெரும்பாலும் ஆய்வகப் பரிசோதனை நெறிமுறைகள் மற்றும் விளையாட்டு வீரர்களின் இணக்கம் ஆகியவற்றுடன் மட்டுமே கட்டுப்படுத்தப்பட்டிருந்த நிலையில், இன்று ஊக்கமருந்துப் பயன்பாடு என்பது ஒரு தனிநபரின் தவறான நடத்தை அல்ல, மாறாக அது ஒரு ஒழுங்கமைக்கப்பட்ட பன்னாட்டு நிறுவனமாக மாறியுள்ளது என்றும், இதுபோன்ற வலையமைப்புகளைத் திறம்படத் தகர்ப்பதற்கு ஒருங்கிணைந்த உலகளாவிய நடவடிக்கை தேவை என்பதையும் டாக்டர் மண்டாவியா குறிப்பிட்டார்.
வலுவான உலகளாவிய கூட்டாண்மைகளின் தேவையை உணர்ந்து, வாடா (WADA) அமைப்பின் தலைவர் திரு. விட்டோல்ட் பாங்கா, “தேசிய ஊக்கமருந்து தடுப்பு அமைப்புகளுக்கும் சட்ட அமலாக்க முகமைகளுக்கும் இடையிலான ஒத்துழைப்பை வலுப்படுத்தும் வகையில் வாடாவின் புலனாய்வு மற்றும் விசாரணை மாதிரி மேம்படுத்தப்பட்டுள்ளது” என்று குறிப்பிட்டார்.
“இந்த மாதிரி, கூட்டாண்மைகளின் அடிப்படையில் கட்டமைக்கப்பட்டுள்ளது. இது, யூரோபோல் மற்றும் இன்டர்போல் போன்ற சர்வதேச கூட்டாளிகளின் ஆதரவுடன், ஊக்கமருந்து தடுப்பு நிபுணர்களின் நிபுணத்துவத்தை சட்ட அமலாக்கத் துறையினரின் திறன்களுடன் ஒன்றிணைக்கிறது,” என்று அவர் மேலும் கூறினார்.
எஸ்.சதிஸ் சர்மா