கடைக்கோடி மக்களை இணைத்து, மிகவும் ஏழ்மையான மற்றும் சேவை கிடைக்காத பகுதிகளுக்கு சேவை செய்யும் வகையில், இந்திய ரயில்வேயானது பிரதம மந்திரி கதி சக்தி தேசிய பெருந்திட்டம் கீழ் ஒரு புரட்சிகரமான விரிவாக்கத்தை மேற்கொண்டு வருகிறது. அனைவரையும் உள்ளடக்கிய வளர்ச்சி மற்றும் தேசிய ஒருமைப்பாட்டில் வலுவான கவனம் செலுத்தி, 2025-26 நிதியாண்டில் புதிய பாதைகள், இரட்டைப் பாதை, பல்பாதை மற்றும் பிற பணிகளை உள்ளடக்கிய 100 ரயில்வே திட்டங்களுக்கு ஒப்புதல் அளிக்கப்பட்டுள்ளது. இந்த முன்னோடியில்லாத முயற்சி, மேம்படுத்தப்பட்ட இணைப்பு வசதிகள் மூலம் பன்முகத்தன்மை கொண்ட தேசத்தை ஒன்றிணைப்பதில் இந்திய ரயில்வேயின் அர்ப்பணிப்பைப் பிரதிபலிப்பதோடு, அதிக திறன் கொண்ட, எதிர்காலத்திற்குத் தயாரான ஒரு வலையமைப்பிற்கு அடித்தளத்தையும் அமைக்கிறது.
6,000 கிலோமீட்டருக்கும் அதிகமான ரயில் பாதை வலையமைப்பை உள்ளடக்கிய இந்தத் திட்டங்கள் முழுவதும் ₹1.53 லட்சம் கோடி மொத்த முதலீடு செய்யப்பட்டுள்ளது. இது ரயில் பாதை விரிவாக்கத்தில் ஒரு வரலாற்றுச் சிறப்புமிக்க மைல்கல்லைக் குறிக்கிறது. 2,800 கிலோமீட்டருக்கும் அதிகமான தூரத்தை உள்ளடக்கிய ₹72,869 கோடி மதிப்பிலான 64 திட்டங்களுக்கு ஒப்புதல் அளிக்கப்பட்ட 2024-25 நிதியாண்டுடன் ஒப்பிடுகையில், திட்ட ஒப்புதல்கள் 56 சதவீதம் அதிகரித்துள்ளன, வழித்தடங்களின் பரப்பளவு 114 சதவீதத்திற்கும் மேலாக உயர்ந்துள்ளது, மேலும் நிதி ஒதுக்கீடு 110 சதவீதத்திற்கும் மேலாக குறிப்பிடத்தக்க வளர்ச்சியைக் கண்டுள்ளது..
இந்த மாபெரும் முதலீடு, கணிசமான வேலைவாய்ப்பை உருவாக்கும் என்றும், எஃகு மற்றும் சிமெண்ட் போன்ற முக்கியத் துறைகளில் தேவையைத் தூண்டும் என்றும், நாடு முழுவதும் போக்குவரத்துச் செலவுகளைக் குறைக்கும் என்றும் எதிர்பார்க்கப்படுகிறது. இந்தத் திட்டங்கள் முன்னேறும்போது, அவை ரயில்வே திறனை மேம்படுத்தி, சேவை வழங்கலைச் செம்மைப்படுத்தி, இந்தியாவின் பொருளாதார வளர்ச்சிக்கு ஒரு வினையூக்கியாகச் செயல்படும். இது படிப்படியான முன்னேற்றம் அல்ல—இது இந்தியா தனது அடுத்த பொருளாதாரப் பாய்ச்சலுக்கான பாதையை அமைப்பதாகும்.
திவாஹர்