மக்களவை சபாநாயகர் திரு ஓம் பிர்லா அவர்கள், காமன்வெல்த் பாராளுமன்ற சங்கத்தின் (சிபிஏ) இந்திய மண்டலத்தின் ஏழாம் மண்டலத்திற்கான முதல் மாநாட்டை 2026 ஏப்ரல் 9 அன்று கோவாவின் பனாஜியில் தொடங்கி வைப்பார்.
கோவா முதலமைச்சர் டாக்டர் பிரமோத் சாவந்த்; மாநிலங்களவை துணைத் தலைவர் திரு. ஹரிவன்ஷ்; மகாராஷ்டிர சட்ட மேலவைத் தலைவர் பேராசிரியர் ராம் ஷிண்டே; மகாராஷ்டிர சட்டசபை சபாநாயகர் வழக்கறிஞர் ராகுல் நார்வேகர்; மற்றும் குஜராத் சட்டசபை சபாநாயகர் திரு. சங்கர்பாய் சௌத்ரி ஆகியோரும் இந்நிகழ்ச்சியில் பிரமுகர்கள் மத்தியில் உரையாற்றுவார்கள்.
கோவா சட்டமன்ற சபாநாயகர் டாக்டர் கணேஷ் காவ்ன்கர் வரவேற்புரை வழங்குவார், மேலும் கோவா சட்டமன்ற விவகாரங்கள் அமைச்சர் திரு மௌவின் கோடினோ நன்றியுரை வழங்குவார்.
ஆந்திரப் பிரதேசம், சத்தீஸ்கர், ஹரியானா, கர்நாடகா, ராஜஸ்தான் மற்றும் தெலங்கானா ஆகிய மாநிலங்களின் சட்டமன்றங்களின் சபாநாயகர்கள் மட்டுமின்றி, கோவாவின் மத்திய அமைச்சர், கோவாவின் நாடாளுமன்ற உறுப்பினர்கள் மற்றும் மூன்று உறுப்பு மாநிலங்களின் சட்டமன்ற உறுப்பினர்களும் இந்த மாநாட்டில் கலந்துகொள்வார்கள்.
இரண்டு நாள் மாநாட்டின் போது, பிரமுகர்கள் பின்வரும் தலைப்புகள் குறித்து விவாதிப்பார்கள்:
i. “2047-ஆம் ஆண்டிற்குள் வளர்ந்த இந்தியாவை உருவாக்கும் இலக்கை அடைவதில் இளம் சட்டமன்ற உறுப்பினர்களின் பங்கு.”
ii. “வர்த்தகம், சுற்றுலா, நகரமயமாக்கல், சுற்றுச்சூழல் மற்றும் கடலோர இணைப்பு ஆகியவற்றில் மண்டலம் VII-இன் முன்னுரிமைகள்.”
சிபிஏ இந்தியா மண்டல மண்டலம்-VII, கோவா, குஜராத் மற்றும் மகாராஷ்டிரா சட்டமன்றங்களை உள்ளடக்கியது. 2024-ல் சிபிஏ இந்தியா மண்டலம் ஒன்பது மண்டலங்களாக மறுசீரமைக்கப்பட்டதைத் தொடர்ந்து, மண்டலம்-VII-ன் முதல் மாநாடு இதுவாகும். தற்போது, குஜராத் சட்டமன்றத்தின் மாண்புமிகு சபாநாயகர், சிபிஏ இந்தியா மண்டல மண்டலம்-VII-ன் தலைவராகப் பணியாற்றுகிறார்.
2026 ஏப்ரல் 10 அன்று நடைபெறவிருக்கும் நிறைவு விழாக் கூட்டத்தொடரில், கோவா ஆளுநர் திரு புசபதி அசோக் கஜபதி ராஜு அவர்களும், மக்களவை சபாநாயகர் திரு ஓம் பிர்லா அவர்களும் கலந்துகொண்டு சிறப்பிக்க உள்ளனர்.
இந்த மாநாடானது, நாடாளுமன்ற ஒத்துழைப்பை வலுப்படுத்துவதையும், சிறந்த நடைமுறைகளைப் பரிமாறிக்கொள்வதை ஊக்குவிப்பதையும், பிராந்தியத்தின் முக்கிய வளர்ச்சி முன்னுரிமைகள் குறித்து விவாதிப்பதையும் நோக்கமாகக் கொண்டுள்ளது.
திவாஹர்