அறிவியல் மற்றும் தொழில்நுட்பம்; புவி அறிவியல் துறைகளின் மத்திய இணை அமைச்சரும் (தனிப் பொறுப்பு), பிரதமர் அலுவலகம், அணுசக்தித் துறை, விண்வெளித் துறை, பணியாளர், பொதுக் குறைகள் மற்றும் ஓய்வூதியங்கள் துறைகளின் இணை அமைச்சருமான டாக்டர் ஜிதேந்திர சிங், மிஷன் கர்மயோகி கட்டமைப்பின் கீழ் கல்வித்துறைத் தலைவர்களுக்கு ஆளுகைத் திறன்களையும் முடிவெடுக்கும் ஆற்றல்களையும் வழங்குவதற்கான ஒரு படியாக, “விஞ்ஞானிகள் மற்றும் கல்வியாளர்களுக்கான நிர்வாகத் திறன் மேம்பாடு” என்ற முதல் பிரத்யேகத் திட்டத்தை இன்று தொடங்கி வைத்தார்.
“சாதனா சப்தா”வின் சிறப்பு அமர்வில் இந்த முன்னெடுப்பை அறிவித்த டாக்டர் ஜிதேந்திர சிங், விஞ்ஞானிகள் மற்றும் கல்வியாளர்களுக்கு முறையான நிர்வாகப் பயிற்சி இல்லாதது நீண்ட காலமாக ஒரு குறைபாடாக இருந்து வருகிறது என்றும், குறிப்பாக அவர்களில் பலர் தலைமைப் பதவிகளுக்கு மாறும் நிலையில் இது ஒரு முக்கியப் பிரச்சினையாக உள்ளது என்றும் கூறினார். அறிவியல் மற்றும் கல்விப் பின்னணியைச் சேர்ந்த வல்லுநர்கள், நிர்வாகச் செயல்முறைகளில் முன் அனுபவம் இல்லாமலேயே நிறுவனப் பொறுப்புகளை ஏற்க வேண்டியுள்ளது என்றும், இந்தப் புதிய திட்டம் இதனை முறையாக நிவர்த்தி செய்வதை நோக்கமாகக் கொண்டுள்ளது என்றும் அவர் குறிப்பிட்டார்.
அறிவியல் தலைமைத்துவத்துடனான கலந்துரையாடல்களில் இருந்து இந்த முயற்சி உருவானதாக விவரித்த டாக்டர் ஜிதேந்திர சிங், இத்தகைய நிறுவனமயமாக்கப்பட்ட கற்றல், அதிக நேரம் எடுக்கக்கூடியதும் சீரற்றதுமான ‘சுய கற்றலை’ சார்ந்திருப்பதைக் குறைக்கும் என்று கூறினார். மேலும், தொழில்நுட்பக் கருவிகளுக்கும் மனித மதிப்பீட்டிற்கும் இடையே ஒரு சமநிலையைப் பேணிக்கொண்டு, செயற்கை நுண்ணறிவு உள்ளிட்ட வளர்ந்து வரும் தொழில்நுட்பங்களுக்கு ஏற்ப இந்தத் திட்டம் ஆற்றல்மிக்கதாகவும் தன்னைத் தகவமைத்துக் கொள்ளக்கூடியதாகவும் இருக்க வேண்டும் என்றும் அவர் குறிப்பிட்டார்.
குறிப்பிட்ட நிர்வாகப் பணிகளுக்கான கட்டமைக்கப்பட்ட பாடத்திட்டங்களை உருவாக்குவது உட்பட, திறன் மேம்பாட்டுக் குழுவிற்கான (CBC) புதிய வழிகாட்டுதல்களையும் அமைச்சர் கோடிட்டுக் காட்டினார். இவற்றில், அதிகாரிகளிடையே நடைமுறைப் புரிதலை வலுப்படுத்துவதற்காக, நாடாளுமன்றக் கேள்விகளுக்குப் பதிலளிப்பது குறித்த ஒரு பிரத்யேகப் பாடத்திட்டத்தை உருவாக்க அவர் பரிந்துரைத்தார். மேலும், அதிகப்படியான பயிற்சிச் சுமையைச் சேர்க்காமல், ஆளுகை அமைப்புகளுடன் பழக்கப்படுத்துவதற்காக, பணி அனுபவம் வாய்ந்த அரசு ஊழியர்கள் மற்றும் உதவிச் செயலாளர்களுக்காக இதேபோன்ற குறுகிய கால அறிமுகப் பாடத்திட்டங்களை வடிவமைக்கலாம் என்றும் அவர் குறிப்பிட்டார்.
திவாஹர்