கடற்படை ஆராய்ச்சி மற்றும் சோதனைத் திறன்களை மேம்படுத்துவதற்காக, விசாகப்பட்டினத்தில் உள்ள என்.எஸ்.டி.எல்-இல் பெரிய குழிவுறுதல் சுரங்கப்பாதைக்கு பாதுகாப்பு அமைச்சர் அடிக்கல் நாட்டினார்.

பாதுகாப்பு அமைச்சர் திரு ராஜ்நாத் சிங், ஏப்ரல் 03, 2026 அன்று, ஆந்திரப் பிரதேசத்தின் விசாகப்பட்டினத்தில் உள்ள பாதுகாப்பு ஆராய்ச்சி மற்றும் மேம்பாட்டு அமைப்பின் (DRDO) முதன்மை ஆய்வகமான கடற்படை அறிவியல் மற்றும் தொழில்நுட்ப ஆய்வகத்தில் (NSTL) அதிநவீன பெரிய குழிவுறுதல் சுரங்கப்பாதை (LCT) வசதிக்கு அடிக்கல் நாட்டினார். இந்த வசதியானது இந்தியாவின் கடற்படை ஆராய்ச்சி மற்றும் சோதனைத் திறன்களை கணிசமாக மேம்படுத்துவதோடு, தொழில்நுட்பத்தில் தன்னிறைவு அடைவதை நோக்கிய ஒரு முக்கிய படியாகவும் அமையும்.

என்.எஸ்.டி.எல்-இல் உள்ள விஞ்ஞானிகள், ஆராய்ச்சியாளர்கள் மற்றும் பணியாளர்களிடையே உரையாற்றிய பாதுகாப்பு அமைச்சர், இந்த முயற்சியின் மூலம் இந்தியா தனது சொந்த வளங்களைப் பயன்படுத்தி, உள்நாட்டிலேயே தனது உபகரணங்கள், அமைப்புகள் மற்றும் துணை அமைப்புகளை வடிவமைத்து, உருவாக்கி, சோதிக்க முடியும் என்றும், தன்னை ஒரு வலிமையான கடற்படை சக்தியாகவும், பாதுகாப்புத் தொழில்நுட்பத்தில் ஒரு தலைவராகவும் நிலைநிறுத்திக் கொள்ள முடியும் என்றும் வலியுறுத்தினார். “இதுவரை, உபகரணங்கள், அமைப்புகள் மற்றும் துணை அமைப்புகளை வெற்றிகரமாக உருவாக்கிய பிறகும், முக்கியமான சோதனைகளுக்காக நாம் அடிக்கடி வெளிநாடுகளை நாட வேண்டியிருந்தது. இந்த நிலை இனி மாறும். இந்த வசதி வெறும் உள்கட்டமைப்புத் திட்டம் மட்டுமல்ல, இது ஒரு துணை அமைப்பாகும். இது உந்துவிசை அமைப்புகளை மேம்படுத்துவதில் நமது திறன்களை வலுப்படுத்தும், இரைச்சலைக் குறைப்பதில் கவனம் செலுத்த உதவும், மேலும் மறைந்திருந்து தாக்கும் திறன்களை வலுப்படுத்தும். இது நீர்மூழ்கிக் கப்பல்கள் மற்றும் கப்பல்களின் வடிவமைப்பு மற்றும் மேம்பாட்டிற்கு ஒரு அடித்தள முதுகெலும்பாகச் செயல்படும், மேலும் கடற்படைப் பொறியியல் மற்றும் கடல்சார் பாதுகாப்பு அமைப்புகளில் எதிர்கால முன்னேற்றங்களுக்கு ஆதரவளிக்கும்,” என்று அவர் கூறினார்.

பிரதமர் திரு நரேந்திர மோடியின் தற்சார்பு இந்தியா தீர்மானத்தின் வெற்றிக்கு இந்தத் திட்டம் ஒரு சின்னம் என திரு ராஜ்நாத் சிங் விவரித்தார். இந்தியாவைத் தற்சார்பு அடையச் செய்வதற்கான அரசின் உறுதிப்பாடு, தேசியப் பாதுகாப்பு அமைப்புடன் உள்ளார்ந்து பிணைக்கப்பட்டுள்ளது என்றும், சவால்கள் இருந்தபோதிலும், உள்நாட்டுத் தொழில் துறை, கல்வித்துறை, குறு, சிறு மற்றும் நடுத்தர நிறுவனங்கள், இளைஞர்கள் மற்றும் ஆராய்ச்சியாளர்களின் ஒருங்கிணைந்த முயற்சிகளால் நாடு பல்வேறு துறைகளில் முழுமையான தற்சார்பை அடைந்துள்ளது என்றும் அவர் குறிப்பிட்டார்.

இந்தப் பயணத்தின்போது, ​​பாதுகாப்பு ஆராய்ச்சி மற்றும் மேம்பாட்டுத் துறையின் செயலாளரும், டி.ஆர்.டி.ஓ-வின் தலைவருமான டாக்டர் சமீர் வி காமத், என்.எஸ்.டி.எல் திட்டங்கள்/நிகழ்ச்சிகள் குறித்து பாதுகாப்பு அமைச்சருக்கு விளக்கினார்.

திரு ராஜ்நாத் சிங், கடற்பயண மற்றும் சூழ்ச்சித் தளத்தையும் பார்வையிட்டார். அங்கு அவர், நீர்மூழ்கி ஏவுகணைகள், கடற்படைக் கண்ணிவெடிகள், ஏமாற்று சாதனங்கள் மற்றும் தானியங்கி நீருக்கடி வாகனங்கள் (AUVகள்) உள்ளிட்ட மேம்பட்ட நீருக்கடி அமைப்புகளின் பிரமிக்க வைக்கும் காட்சியை கண்டுகளித்தார்.

மனிதனால் எடுத்துச் செல்லக்கூடிய தன்னாட்சி நீருக்கடியில் இயங்கும் வாகனங்களின் (AUV) கூட்டத்தின் நேரடி செயல்விளக்கம், தன்னாட்சி கடல்சார் செயல்பாடுகள் மற்றும் அடுத்த தலைமுறை நீருக்கடியில் போர் தொழில்நுட்பங்களில் இந்தியாவின் வளர்ந்து வரும் ஆற்றலை வெளிப்படுத்தியதுடன், எதிர்காலத்திற்குத் தயாரான பாதுகாப்பு அமைப்புகள் மீதான நாட்டின் கவனத்தையும் அடிக்கோடிட்டுக் காட்டியது. மேலும், ‘ஆபரேஷன் சிந்துர்’-க்குப் பிறகு கடற்படை அமைப்புப் பொருட்கள் தொகுப்பு ஆய்வகங்களால் துணைத் தொழில்நுட்பங்களாக உருவாக்கப்பட்ட சில முக்கிய தயாரிப்புகளையும் பாதுகாப்பு அமைச்சர் ஆய்வு செய்தார்.

டார்பிடோ அமைப்புகள், நீருக்கடியில் உள்ள கண்ணிவெடிகள், ஏமாற்று சாதனங்கள் மற்றும் தன்னாட்சி நீருக்கடியில் வாகனங்கள் (AUVs) உள்ளிட்ட பல துறைகளில் ஆராய்ச்சிகளை மேற்கொண்டு, தர அளவுகளை நிர்ணயித்து, இந்தியாவை ஒரு வலிமையான கடற்படை சக்தியாக மாற்றுவதற்கான பாதையில் முன்னோக்கிச் செலுத்தியதற்காக என்.எஸ்.டி.எல்-ஐ (NSTL) திரு ராஜ்நாத் சிங் பாராட்டினார். மேலும், திரள் தொழில்நுட்பத்தின் செயல்விளக்கத்தையும், லித்தியம்-அயன் மின்கல மேம்பாட்டில் நடைபெற்று வரும் பணிகளையும் அவர் அங்கீகரித்ததோடு, அவை எதிர்காலப் போர் தயார்நிலைக்கு முக்கியமானவை என்றும் குறிப்பிட்டார்.

நாட்டின் பாதுகாப்பு உள்கட்டமைப்பை வலுப்படுத்துவதன் மூலம், தேசத்தைக் கட்டியெழுப்பும் பணியில் அர்ப்பணிப்புடன் தொடர்ந்து செயல்படுமாறு என்.எஸ்.டி.எல்-ஐ பாதுகாப்பு அமைச்சர் வலியுறுத்தினார். “இந்த அமைப்புகளும் தொழில்நுட்பங்களும் கடலில் பணியில் ஈடுபடுத்தப்பட்டுள்ள மாலுமிகளின் நம்பிக்கையையும் மன உறுதியையும் அதிகரிக்கின்றன. நம்பகமான மற்றும் வலுவான தொழில்நுட்ப ஆதரவு, பாதுகாப்புப் படைகளின் செயல்பாட்டுத் திறனை கணிசமாக மேம்படுத்துகிறது,” என்று அவர் கூறினார்.

பாதுகாப்புப் படைத் தலைமைத் தளபதி ஜெனரல் அனில் சௌகான், கடற்படைத் தலைமைத் தளபதி அட்மிரல் தினேஷ் கே திரிபாதி, கிழக்கு கடற்படைத் தளத்தின் தலைமைத் தளபதி வைஸ் அட்மிரல் சஞ்சய் பல்லா மற்றும் பிற மூத்த அதிகாரிகள் இந்நிகழ்ச்சியில் கலந்துகொண்டனர்.

பெரிய குழிவு சுரங்கப்பாதை பற்றி

ஒரு மூலோபாய தேசிய சொத்தாகக் கருதப்படும் இந்தத் திட்டம், அடுத்த தலைமுறை கப்பல்கள், நீர்மூழ்கிக் கப்பல்கள் மற்றும் நீருக்கடியில் இயங்கும் தளங்களின் வடிவமைப்பு மற்றும் மேம்பாட்டிற்கு ஆதரவளிக்கும் நோக்கில், நீரியல் இயக்கவியல் ஆராய்ச்சியில் உள்நாட்டுத் திறன்களை வலுப்படுத்துவதில் ஒரு முக்கியப் படியாகும். அரசாங்கத்தால் அங்கீகரிக்கப்பட்டு, சர்வதேச தொழில்நுட்ப ஒத்துழைப்புடன் முழுப் பொறுப்பு முறையில் செயல்படுத்தப்படும் இத்திட்டம், உலகளாவிய நிபுணத்துவம் மற்றும் உள்நாட்டுப் புத்தாக்கத்தின் ஒரு தடையற்ற கலவையைப் பிரதிபலிக்கிறது.

நீர்மூழ்கிக் கப்பல் ஆய்வுகளுக்கு அவசியமான மூடிய-சுற்று உருவகப்படுத்துதல்களையும், மேற்பரப்புக் கப்பல் ஆராய்ச்சிக்கு இன்றியமையாத திறந்த மேற்பரப்பு உருவகப்படுத்துதல்களையும் ஒரே ஒருங்கிணைந்த அமைப்பிற்குள் நடத்தும் திறனுடன், இந்த வசதியானது உலகளவில் ஒரு தனித்துவமான உள்கட்டமைப்பாக உருவெடுக்கத் தயாராக உள்ளது. இது செயல்பாட்டுக்கு வந்தவுடன், அழிப்புக் கப்பல்கள் மற்றும் விமானம் தாங்கிக் கப்பல்கள் உள்ளிட்ட முக்கிய கடற்படைக் தளங்களுக்கான நீரியக்கவியல் வடிவமைப்புகள் மற்றும் உந்துவிசை அமைப்புகளின் துல்லியமான சரிபார்ப்பைச் சாத்தியமாக்குவதன் மூலம், நாட்டின் கப்பல் கட்டும் சூழலமைப்பை இது கணிசமாக மேம்படுத்தும்.

திவாஹர்