பாதுகாப்பு அமைச்சகம், பாதுகாப்பு அமைச்சகத்தின் (நிதி), கொள்முதல் பிரிவு, பாதுகாப்பு சேவைகள் மற்றும் பாதுகாப்பு கணக்குத் துறை ஆகியவற்றின் கூட்டு முயற்சியால், 2025-26 நிதியாண்டிற்கான பாதுகாப்பு சேவைகளுக்காக ஒதுக்கப்பட்ட ரூ. 1.86 லட்சம் கோடி மூலதன ஒதுக்கீட்டை, திருத்தப்பட்ட மதிப்பீட்டு நிலையில் முழுமையாகப் பயன்படுத்தியுள்ளது. பல ஆண்டுகளுக்குப் பிறகு, 2024-25 நிதியாண்டில் மூலதன நிதி ஒதுக்கீட்டை முழுமையாகப் பயன்படுத்தியதன் தொடர்ச்சியாக, பாதுகாப்பு அமைச்சகம் இந்த மைல்கல்லை எட்டியுள்ளது. பாதுகாப்பு அமைச்சகத்திற்கான இறுதி ஒதுக்கீட்டிற்கு எதிராக, 2025-26 நிதியாண்டில் பாதுகாப்பு அமைச்சகத்தின் (குடிமை), ஓய்வூதியம் போன்றவற்றை உள்ளடக்கிய பாதுகாப்பு நிதி ஒதுக்கீட்டின் ஒட்டுமொத்த பயன்பாடு 99.62% ஆக உள்ளது.
மூலதனச் செலவினத்திற்கான ஆரம்ப ஒதுக்கீடு ரூ. 1.80 லட்சம் கோடியாக இருந்தது. முதல் இரண்டு காலாண்டுகளில் பாதுகாப்பு அமைச்சகம் அடைந்த செலவின வேகத்தையும், ‘ஆபரேஷன் சிந்துர்’ நடவடிக்கைக்குப் பிறகு படைகளின் நவீனமயமாக்கல் மற்றும் பிற தேவைகளுக்காக அதிகரித்துள்ளதையும் கருத்தில் கொண்டு, நிதி அமைச்சகம் இந்த ஒதுக்கீட்டை மேலும் உயர்த்தியது.
செலவினத்தின் ஒரு குறிப்பிடத்தக்க பகுதி, விமானங்கள் மற்றும் வானூர்தி இயந்திரங்களைக் கொள்முதல் செய்வதற்கும், அதனைத் தொடர்ந்து தரை அமைப்புகள், மின்னணுப் போர் உபகரணங்கள், ஆயுதங்கள், கப்பல் கட்டுமானம், விமானப் பொருட்கள் மற்றும் எறிகணைகள் ஆகியவற்றை வாங்குவதற்கும் செய்யப்படுகிறது. இவற்றில், பல்நோக்கு போர் விமானங்களைக் கொள்முதல் செய்வதற்கான முன்மொழிவுகள், விமானப்படைக்கான நடுத்தர உயரத்தில் நீண்ட நேரம் பறக்கும் ஆளில்லா விமானக் கொள்முதல், கடற்படைக்கான கண்ணிவெடித் தடுப்புக் கப்பல்கள், தரையிலிருந்து வான் நோக்கிச் செல்லும் விரைவு ஏவுகணை அமைப்பு மற்றும் தரைப்படைக்கான நாக் ஏவுகணை அமைப்பு மார்க்-2 போன்றவை அடங்கும்.
ஆயுதப் படைகளை நவீனமயமாக்குவதுடன், செலவினங்களைத் திறம்படப் பயன்படுத்துவது எல்லைப் பகுதிகளில் உள்கட்டமைப்பு மேம்பாட்டிற்கும் உதவும். மேலும், இது மூலதன உருவாக்கம் மற்றும் வேலைவாய்ப்புகளை உருவாக்குவதில் ஏற்படுத்தும் பெருக்க விளைவின் மூலம் நாட்டின் ஒட்டுமொத்த பொருளாதார வளர்ச்சிக்கும் துணைபுரியும்.
2024-25 நிதியாண்டில் ரூ. 1.76 லட்சம் கோடி மதிப்பிலான 56 முன்மொழிவுகளுக்கு ஒப்புதல் அளிக்கப்பட்டிருந்த நிலையில், 2025-26 நிதியாண்டில் ரூ. 6.81 லட்சம் கோடி மதிப்பிலான 109 முன்மொழிவுகளுக்கு பாதுகாப்பு அமைச்சகத்தால் ஒப்புதல் வழங்கப்பட்டுள்ளது. மேலும், 2025-26 நிதியாண்டில் ரூ. 2.28 லட்சம் கோடி மதிப்பிலான மொத்தம் 503 முன்மொழிவுகளுக்கான மூலதனக் கொள்முதல் ஒப்பந்தங்களில் பாதுகாப்பு அமைச்சகம் கையெழுத்திட்டுள்ளது.
நமது ஆயுதப் படைகளை நவீனமயமாக்கி வலுப்படுத்தும் முயற்சிகளை மேலும் ஊக்குவிக்கும் வகையில், பாதுகாப்பு அமைச்சகத்திற்கு 2026-27 நிதியாண்டிற்காக, மதிப்பீட்டு நிலையின்போது மூலதனத் தலைப்பின் கீழ் 22% உயர்வுடன் ரூ. 2.19 லட்சம் கோடி ஒதுக்கீடு செய்யப்பட்டுள்ளது.
திவாஹர்