மேற்கு ஆசியாவில் உருவாகி வரும் சூழ்நிலையைக் கண்காணிப்பதற்கும், அங்கு ஏற்படும் முன்னேற்றங்களுக்கு ஏற்ப முன்கூட்டியே எடுக்கப்பட வேண்டிய நடவடிக்கைகளைப் பரிந்துரைப்பதற்கும் அமைக்கப்பட்ட அமைச்சர்களின் முறைசாராக் குழுவின் (IGoM) முதல் கூட்டத்திற்கு பாதுகாப்பு அமைச்சர் திரு ராஜ்நாத் சிங், மார்ச் 28, 2026 அன்று தலைமை தாங்கினார். புது தில்லி, கர்த்தவ்ய பவன்-2 இல் நடைபெற்ற இக்கூட்டத்தில், நிதி மற்றும் பெருநிறுவன விவகாரங்கள் துறை அமைச்சர் திருமதி நிர்மலா சீதாராமன்; நாடாளுமன்ற விவகாரங்கள் துறை அமைச்சர் திரு கிரண் ரிஜிஜு; பெட்ரோலியம் மற்றும் இயற்கை எரிவாயு துறை அமைச்சர் திரு ஹர்தீப் சிங் பூரி; மின்சாரத் துறை அமைச்சர் திரு மனோகர் லால்; இரசாயனங்கள் மற்றும் உரங்கள் துறை அமைச்சர் திரு ஜகத் பிரகாஷ் நட்டா; நுகர்வோர் விவகாரங்கள், உணவு மற்றும் பொது விநியோகத் துறை அமைச்சர் திரு பிரகலாத் ஜோஷி; சிவில் விமானப் போக்குவரத்துத் துறை அமைச்சர் திரு கிஞ்சரபு ராம்மோகன் நாயுடு; மற்றும் அறிவியல் மற்றும் தொழில்நுட்ப அமைச்சகத்தின் (தனிப் பொறுப்பு) இணை அமைச்சர் டாக்டர் ஜிதேந்திர சிங் ஆகியோர் கலந்து கொண்டனர்.
இந்தியாவின் பல்வேறு துறைகளில் உருவாகி வரும் சூழ்நிலையையும் அதன் தாக்கத்தையும் இந்திய அமைச்சர்கள் குழு முழுமையாக ஆய்வு செய்தது. பாதுகாப்பு அமைச்சர், ஒரு செயலூக்கமான, ஒருங்கிணைந்த மற்றும் தொலைநோக்குப் பார்வை கொண்ட அணுகுமுறையின் அவசியத்தை வலியுறுத்தியதோடு, மாறிவரும் சூழலைக் கருத்தில் கொண்டு விழிப்புடன் இருப்பதன் முக்கியத்துவத்தையும் எடுத்துரைத்தார்.
கூட்டத்தின் ஒரு பகுதியாக, ஏழு அதிகாரமளிக்கப்பட்ட செயலாளர் குழுக்கள் (EGoS) அடையாளம் காணப்பட்ட முக்கிய துறைசார் பிரச்சினைகளையும், நிலைமையை நிர்வகிக்க ஏற்கனவே நடைமுறைப்படுத்தப்பட்ட கொள்கை நடவடிக்கைகளையும் கோடிட்டுக் காட்டி விளக்கங்களை அளித்தன. நிலைமையை தொடர்ந்து உன்னிப்பாகக் கண்காணித்தல், நடுத்தர முதல் நீண்ட கால தயார்நிலை அணுகுமுறையைக் கடைப்பிடித்தல், உயர் மட்ட ஒருங்கிணைப்பைப் பேணுதல் மற்றும் விரைவான முடிவெடுப்பதை உறுதி செய்தல் ஆகியவற்றைத் தொடருமாறு திரு. ராஜ்நாத் சிங் அதிகாரமளிக்கப்பட்ட செயலாளர் குழுக்களுக்கு (EGoS) வழிகாட்டினார். அனைத்து கொள்கை முயற்சிகளும் ஒருங்கிணைந்து செயல்பட வேண்டும் என்றும், காலவரையறைக்குள் செயல்படுத்தப்பட வேண்டும் என்றும் அவர் வலியுறுத்தினார். இந்தியா மீள்திறனுடனும் தயார்நிலையுடனும் இருப்பதை உறுதிசெய்ய, சம்பந்தப்பட்ட அனைத்து அமைச்சர்களிடமிருந்தும் ஆக்கப்பூர்வமான கருத்துக்களையும் அவர் கோரினார்.
மாநிலங்கள் மற்றும் மாவட்ட நிர்வாகங்களுடன் நெருங்கிய ஒருங்கிணைப்புடன், முக்கிய கொள்கை முன்னெடுப்புகளை உரிய நேரத்தில் பொதுமக்களுக்குத் தெரிவிப்பதன் முக்கியத்துவத்தை அமைச்சர்கள் குழு மீண்டும் வலியுறுத்தியது. பல்வேறு தொழில்துறைகளில் தற்போதைய சூழ்நிலையின் தாக்கத்தை மதிப்பிட வேண்டியதன் அவசியம் குறித்தும் விவாதிக்கப்பட்டது. மேலும், குடிமக்களுக்குத் துல்லியமான தகவல்கள் பரவுவதை உறுதி செய்வதற்கும், வதந்திகள், தவறான தகவல்கள் மற்றும் போலிச் செய்திகளைத் திறம்பட முறியடிப்பதற்கும், அனைத்து அமைச்சகங்களும் துறைகளும் தற்போதைய சூழ்நிலை தொடர்பான பொருத்தமான தகவல்கள், முன்னேற்றங்கள் மற்றும் ஆலோசனைகளை MIB வாட்ஸ்அப் சேனல் மூலம் பகிர்ந்து கொள்ள வேண்டும் என்றும் அறிவுறுத்தப்பட்டது.
திவாஹர்