அறிவியல் மற்றும் தொழில்நுட்பம், புவி அறிவியல் ஆகிய துறைகளின் மத்திய இணை அமைச்சரும் (தனிப் பொறுப்பு), பிரதமர் அலுவலகம், பணியாளர், பொதுக் குறைகள், ஓய்வூதியங்கள், அணுசக்தி மற்றும் விண்வெளி ஆகிய துறைகளின் இணை அமைச்சருமான டாக்டர் ஜிதேந்திர சிங் இன்று கூறுகையில், கடந்த 11 ஆண்டுகளில் மோடி அரசு, ஜம்மு காஷ்மீர் இளைஞர்களை சமூக நீரோட்டத்தில் இணைக்க வழிவகுத்துள்ளது என்றும், இது அவர்களின் தன்னம்பிக்கையையும் லட்சியங்களையும் உயர்த்தியுள்ளது என்றும் தெரிவித்தார்.
இளைஞர் விவகாரங்கள் மற்றும் விளையாட்டு அமைச்சகத்தின் ஆதரவிலும், உள்துறை அமைச்சகத்தின் ஒத்துழைப்பிலும் ‘மை பாரத்’ அமைப்பால் ஏற்பாடு செய்யப்பட்ட 6வது காஷ்மீர் இளைஞர் பரிமாற்றத் திட்டமான “வதன் கோ ஜானோ”-வில் பங்கேற்றவர்களுடன் கலந்துரையாடிய அமைச்சர், ஜம்மு காஷ்மீர் இளைஞர்கள் தற்போது குடிமைப் பணிகள் மற்றும் பிற போட்டித் தேர்வுகளில் முதலிடம் பிடித்து வருவதாகக் கூறினார். முன்னதாக, இப்பகுதியைச் சேர்ந்த பல இளைஞர்கள் தங்கள் உடனடி சுற்றுப்புறத்தைத் தாண்டிச் செல்லத் தயங்கினர், ஆனால் இன்று அவர்கள் நாடு முழுவதும் உள்ள வாய்ப்புகளை நம்பிக்கையுடன் பயன்படுத்திக்கொண்டு, சுற்றுலா, விருந்தோம்பல் மற்றும் விமானப் போக்குவரத்து போன்ற தேசியத் துறைகளுக்குப் பங்களித்து வருகின்றனர் என்றும் அவர் குறிப்பிட்டார்.
2014-ல் பிரதமர் நரேந்திர மோடி முன்வைத்த தொலைநோக்குப் பார்வையை நினைவு கூர்ந்த டாக்டர் ஜிதேந்திர சிங், நீண்ட காலமாக வளர்ச்சியின் விளிம்பில் இருந்த ஜம்மு காஷ்மீர் மற்றும் வடகிழக்கு போன்ற பிராந்தியங்களுக்குக் கவனம் செலுத்தப்பட்டதாகக் கூறினார். தொடர்ச்சியான கொள்கை ஆதரவும், இலக்கு வைக்கப்பட்ட தலையீடுகளும் இந்த இடைவெளியைக் குறைக்க உதவியுள்ளன என்றும், ஜம்மு காஷ்மீர் இளைஞர்களின் நம்பிக்கை, முன்னேற்றம் மற்றும் லட்சியங்களில் காணப்படும் மாற்றம் இந்த உருமாற்றத்தைப் பிரதிபலிக்கிறது என்றும் அவர் கூறினார்.
புல்வாமா, பண்டிபோரா, அனந்த்நாக் மற்றும் குப்வாரா போன்ற மாவட்டங்களைச் சேர்ந்த இளம் பங்கேற்பாளர்கள், நாட்டின் பிற பகுதிகளுடன் தங்களை இணைத்துக்கொண்ட அனுபவங்களைப் பகிர்ந்துகொள்வதற்கு இந்தக் கலந்துரையாடல் ஒரு தளத்தை வழங்கியது. பல பங்கேற்பாளர்கள், நாடாளுமன்றம், சட்டமன்றம் மற்றும் குடியரசுத் தலைவர் மாளிகை உள்ளிட்ட தேசிய நிறுவனங்களுக்குத் தாங்கள் மேற்கொண்ட பயணங்களைப் பற்றிப் பேசினர். அத்தகைய அனுபவங்கள், இந்தியாவின் ஜனநாயகக் கட்டமைப்பில் தங்களுக்குரிய ஓர் அங்கத்துவ உணர்வையும் பங்களிப்பையும் எவ்வாறு வலுப்படுத்தியுள்ளன என்பதையும் அவர்கள் விவரித்தனர்.
இது போன்ற திட்டங்கள், ஜம்மு காஷ்மீர் இளைஞர்கள் தங்களின் முந்தைய வரம்புகளைக் கடந்து, நாடு முழுவதும் உள்ள பல்வேறு கலாச்சாரங்கள் மற்றும் சமூகங்களுடன் தீவிரமாக ஈடுபட உதவுகின்றன என்று பங்கேற்பாளர்கள் பகிர்ந்துகொண்டனர். நம்பிக்கை மற்றும் வெளிப்படைத்தன்மை அதிகரித்து வருவதாகவும், மேலும் அதிகமான இளைஞர்கள் இப்போது இப்பகுதிக்கு வெளியே உள்ள வாய்ப்புகளை ஆராயவும், அர்த்தமுள்ள தொடர்புகளை உருவாக்கவும் தயாராக இருப்பதாகவும் பல மாணவர்கள் குறிப்பிட்டனர்.
விளையாட்டு மற்றும் போட்டித் தேர்வுகளில் தங்கள் வாழ்க்கையைத் தொடரும் இப்பகுதியைச் சேர்ந்த இளம் சாதனையாளர்கள், தங்கள் முன்னேற்றத்தையும் லட்சியங்களையும் எடுத்துரைத்தனர். உள்ளூர் திறமையாளர்களின் ஆற்றலை முழுமையாக வெளிக்கொணர, ஜம்மு காஷ்மீரில் விளையாட்டு உள்கட்டமைப்பை மேலும் வலுப்படுத்தவும், பயிற்சி பெறுவதற்கான அணுகலை அதிகரிக்கவும், வசதிகள் கிடைப்பதை உறுதி செய்யவும் வேண்டியதன் அவசியத்தை சில பங்கேற்பாளர்கள் சுட்டிக்காட்டினர். இந்த உள்ளீடுகளுக்குப் பதிலளித்த அமைச்சர், தேர்வு செயல்முறைகளில் அதிக வெளிப்படைத்தன்மை மற்றும் உள்கட்டமைப்பில் அதிகரித்த முதலீடு ஆகியவற்றின் மூலம் ஜம்மு காஷ்மீரில் விளையாட்டு மற்றும் இளைஞர் மேம்பாட்டுக்கான சூழல் சீராக மேம்பட்டு வருவதாகக் கூறினார். ஜம்மு காஷ்மீர் கிரிக்கெட் அணி சமீபத்தில் வென்ற ரஞ்சி கோப்பையை அவர் மேற்கோள் காட்டினார்.
தளவாட ஏற்பாடுகளை மேம்படுத்துவது மற்றும் நிறுவன வருகைகள், சக மாணவர் ஈடுபாடு ஆகியவற்றின் மூலம் நாட்டின் பிற பகுதிகளைச் சேர்ந்த மாணவர்களுடன் கட்டமைக்கப்பட்ட தொடர்பை வலுப்படுத்துவது குறித்தும் ஆலோசனைகள் பெறப்பட்டன. அமைச்சர் இந்த ஆலோசனைகளை ஏற்றுக்கொண்டதோடு, இத்தகைய உள்ளீடுகள் எதிர்காலத் திட்டங்களின் வடிவமைப்பை மேலும் வலுப்படுத்த உதவும் என்றும் குறிப்பிட்டார்.
நாட்டின் வளர்ச்சிப் பயணத்தில் எந்தவொரு பிராந்தியமோ அல்லது சமூகப் பிரிவோ பின்தங்கிவிடாமல் இருப்பதை உறுதி செய்வதற்கான ஒரு பெரிய முயற்சியின் ஒரு பகுதியே ஜம்மு காஷ்மீரில் நடைபெற்று வரும் மாற்றம் என்று டாக்டர் ஜிதேந்திர சிங் கூறினார். தேசிய வாழ்வில் ஜம்மு காஷ்மீர் இளைஞர்களின் அதிகரித்து வரும் பங்கேற்பு இந்த மாற்றத்தின் தெளிவான அறிகுறி என்றும், அவர்களின் வளர்ந்து வரும் தன்னம்பிக்கையும் லட்சியங்களும் இந்தியாவின் எதிர்காலத்தை வடிவமைப்பதில் முக்கியப் பங்கு வகிக்கும் என்றும் அவர் கூறினார்.
ஜம்மு காஷ்மீரின் வளமான பாரம்பரியத்தை வெளிக்காட்டியும், ஒருங்கிணைப்பு மற்றும் பகிரப்பட்ட அடையாள உணர்வை வலுப்படுத்தியும், பங்கேற்பாளர்கள் வழங்கிய கலாச்சார நிகழ்ச்சிகளுடன் இந்த நிகழ்ச்சி நிறைவடைந்தது.
எஸ்.சதிஸ் சர்மா