ஒருமித்த கருத்தின் அடிப்படையிலான முடிவெடுத்தலே உலக வர்த்தக அமைப்பின் நம்பகத்தன்மைக்கு அடித்தளம்: மத்திய தொழில்துறை அமைச்சர் பியூஷ் கோயல்.

கேமரூனின் யவுண்டே நகரில் தற்போது நடைபெற்று வரும் உலக வர்த்தக அமைப்பின் 14வது மாநாட்டின் இரண்டாம் நாளில், உலக வர்த்தக அமைப்பின் உறுப்பு நாடுகளின் வர்த்தக அமைச்சர்கள் உலக வர்த்தக அமைப்பின் சீர்திருத்தப் பிரச்சினைகள் குறித்து விவாதித்தனர். மாண்புமிகு வர்த்தகம் மற்றும் தொழில்துறை அமைச்சர் திரு பியூஷ் கோயல் அவர்கள், 14வது மாநாட்டிற்கான இந்தியக் குழுவிற்குத் தலைமை தாங்குகிறார்.

‘கடந்தகால ஆணைகள் உட்பட முடிவெடுத்தல்’ என்ற பிரச்சினை குறித்துப் பேசிய திரு. கோயல், ஒருமித்த கருத்தின் அடிப்படையிலான முடிவெடுத்தலே உலக வர்த்தக அமைப்பின் (WTO) சட்டபூர்வத்தன்மைக்கு அடித்தளம் என்றும், தாங்கள் ஏற்றுக்கொள்ளாத விதிகளுக்குக் கட்டுப்படாமல் இருப்பதற்கான ஒவ்வொரு உறுப்பு நாட்டின் இறையாண்மை உரிமையையும் உலக வர்த்தக அமைப்பு புறக்கணிக்கக் கூடாது என்றும் வலியுறுத்தினார். ஒருமித்த கருத்தின் மூலம் முடிவுகளை எட்டுவதில் உள்ள சவால்களைக் கடப்பதற்கு நம்பிக்கையை மீண்டும் கட்டியெழுப்புவதன் முக்கியத்துவத்தை அடிக்கோடிட்டுக் காட்டிய இந்தியா, தற்போதைய முட்டுக்கட்டையையும் அதன் அடிப்படைக் காரணங்களையும் உலக வர்த்தக அமைப்பு கவனமாக ஆய்வு செய்ய வேண்டியதன் முக்கியத்துவத்தையும், அதே நேரத்தில் விவாதங்கள் வெளிப்படையானதாகவும், அனைவரையும் உள்ளடக்கியதாகவும், உறுப்பு நாடுகளால் வழிநடத்தப்படுவதாகவும் இருப்பதை உறுதி செய்ய வேண்டும் என்றும் வலியுறுத்தியது. ஒரு ஒருங்கிணைந்த பலதரப்பு வர்த்தக அமைப்பானது, அதன் சொந்த நிறுவனக் கட்டமைப்பிற்குள் நிலவும் பிளவுகளுடன் செழிக்க முடியாது என்பதையும் இந்தியா எடுத்துரைத்தது.

‘சமமான போட்டித்தளப் பிரச்சினைகள்’ குறித்துப் பேசிய திரு. கோயல், உருகுவே சுற்றுப் பேச்சுவார்த்தைகளில் இருந்து உருவான சமச்சீரற்ற தன்மைகளை விவாதங்கள் கணக்கில் எடுத்துக்கொள்ள வேண்டும் என்று வலியுறுத்தினார். கட்டமைப்பு ரீதியான சமச்சீரற்ற தன்மைகளைச் சரிசெய்வதற்கான புதிய பிரச்சினைகளைக் கையாளும் அதே வேளையில், உணவுப் பாதுகாப்பு, PSH, பருத்தி மீதான SSM போன்ற நீண்டகாலமாக நிலுவையில் உள்ள பிரச்சினைகளுக்கு முன்னுரிமை அளிக்கப்பட வேண்டும் என்பதில் இந்தியா கவனம் செலுத்தியது. தகராறு தீர்வு அமைப்பின் தொடர்ச்சியான செயலிழப்பைச் சுட்டிக்காட்டி, திறம்பட்ட தீர்ப்பு இல்லாமல், விதிகள் அவற்றின் அமலாக்கத்தன்மையை இழக்கின்றன என்றும், அதன் மூலம் சிறிய பொருளாதாரங்கள் விகிதாசாரமற்ற முறையில் பாதகமாகப் பாதிக்கப்படுகின்றன என்றும் இந்தியா வலியுறுத்தியது. வர்த்தகப் பழிவாங்கலை நியாயப்படுத்தவோ அல்லது சட்டபூர்வமான உள்நாட்டுக் கொள்கைகளுக்கு சவால் விடவோ வெளிப்படைத்தன்மையை ஒரு ஆயுதமாகப் பயன்படுத்துவதற்கு எதிராகவும் இந்தியா எச்சரித்தது. அதற்குப் பதிலாக, அனைத்து உறுப்பு நாடுகளும் தங்கள் கடமைகளை நியாயமாகவும் திறம்படவும் நிறைவேற்றுவதை உறுதிசெய்யும் வகையில், அர்த்தமுள்ள மற்றும் நீடித்த திறன் மேம்பாட்டு ஆதரவுடன் அது இணைக்கப்பட வேண்டும். உற்பத்தித் திறனை வளர்த்துக் கொள்ளவும், வேலைவாய்ப்பை உருவாக்கவும், உலகளாவிய வர்த்தகத்தில் அர்த்தமுள்ள வகையில் பங்கேற்கவும் அனைத்து உறுப்பு நாடுகளுக்கும் நியாயமான வாய்ப்பு இருப்பதன் முக்கியத்துவத்தையும் இந்தியா வலியுறுத்தியது.

உலக வர்த்தக அமைப்பின் சீர்திருத்த வெளிப்படைத்தன்மை குறித்த அமைச்சர்கள் மட்டத்திலான முழு அமர்வுடன் அன்றைய தினம் நிறைவடைந்தது. இந்த அமர்வின் போது உரையாற்றிய வர்த்தகச் செயலாளர் திரு ராஜேஷ் அகர்வால், மேலும் வலுவான ஆதாரப் பகுப்பாய்வின் அடிப்படையிலும், சமர்ப்பிப்புகள் மற்றும் அமைச்சர்களின் முடிவுகளுடனான ஈடுபாட்டின் மூலமாகவும், மைல்கற்களுடன் கூடிய காலவரையறைக்குள் சீர்திருத்த முயற்சிகளை மீண்டும் தொடங்குவதற்கு இந்தியாவின் ஆதரவைத் தெரிவித்தார். பிரச்சினைகளைத் தேர்ந்தெடுத்துப் பேசுவதையும், முன்முடிவுகளையும் பாரபட்சமான நிலைப்பாடுகளையும் பரப்புவதையும் தவிர்க்க வேண்டும் என்று இந்தியா திட்டவட்டமாகக் கேட்டுக்கொண்டது. உலக வர்த்தக அமைப்பின் குழுக்களின் பங்கிற்கு அதிக முக்கியத்துவம் கொடுக்க வேண்டியதன் அவசியத்தையும் இந்தியா எடுத்துரைத்தது. ஏனெனில், அக்குழுக்கள் தங்களின் அனுபவப்பூர்வமான கற்றல் மூலம், அடிமட்டத்திலிருந்து தொடங்கும் அணுகுமுறையில் ஒரு முழுமையான மதிப்பீட்டிற்குப் பங்களிக்க முடியும். பலதரப்பு வர்த்தக அமைப்பை பலதரப்பு அமைப்புகள் துண்டாடுவதற்கு எதிராக எச்சரித்த திரு அகர்வால், ஒருமித்த கருத்து உருவாக்கும் செயல்முறையானது வெளிப்படைத்தன்மை, ஒளிவுமறைவின்மை, அனைவரையும் உள்ளடக்குதல், பங்கேற்பு மற்றும் உறுப்பு நாடுகளை மையமாகக் கொண்ட கொள்கைகளின் அடிப்படையில் அமைய வேண்டும் என்றும் அழைப்பு விடுத்தார்.

MC14 கூட்டங்களின் இரண்டாம் நாள் நிகழ்வின் இடையே, திரு கோயல் அவர்கள் அமெரிக்கா, சீனா, கொரியா, சுவிட்சர்லாந்து, நியூசிலாந்து, கனடா, மொராக்கோ மற்றும் ஓமன் ஆகிய நாடுகளின் பிரதிநிதிகளுடன் இருதரப்பு சந்திப்புகளை நடத்தினார். MC 14 நிகழ்ச்சி நிரல் மற்றும் இருதரப்பு வர்த்தக உறவுகளை ஆழப்படுத்துவது தொடர்பான விடயங்கள் குறித்து விவாதங்கள் கவனம் செலுத்தின.

எஸ்‌.சதிஸ் சர்மா