மரபணு மற்றும் அரிய நோய்களை எதிர்கொள்வதில், ஆரம்பகால கண்டறிதல் மற்றும் மலிவு விலை இரண்டு பெரிய சவால்கள் என்பதை வலியுறுத்தி, அறிவியல் மற்றும் தொழில்நுட்பம், புவி அறிவியல் துறை (தனிப்பொறுப்பு) மற்றும் பிரதமர் அலுவலகம், விண்வெளித் துறை மற்றும் அணுசக்தித் துறை இணையமைச்சர் டாக்டர் ஜிதேந்திர சிங் இன்று, மரபணுவியல், உயிரி தொழில்நுட்பம் மற்றும் தடுப்பு சுகாதாரப் பராமரிப்பு மூலம் சிக்கலான சுகாதார சவால்களை எதிர்கொள்ள இந்தியா இப்போது அறிவியல் ரீதியாகவும் பொருளாதார ரீதியாகவும் தயாராக உள்ளது என்று கூறினார்.
ஹைதராபாத்தில் உள்ள டிபிடி-பிரிக் டிஎன்ஏ கைரேகை மற்றும் நோயறிதலுக்கான மையத்திற்கு (சிடிஎஃப்டி) விஜயம் செய்தபோது அமைச்சர் இவ்வாறு பேசினார். அங்கு அவர் சமர்த் தேசிய திறன் மேம்பாட்டு மையத்திற்கு அடிக்கல் நாட்டினார் மற்றும் ஐடிஏ-என்ஏ பிரிக்-சிடிஎஃப்டி தொழில்நுட்ப இன்குபேட்டரைத் திறந்து வைத்தார்.
இந்தியா முதன்மையாக தொற்று நோய்களை எதிர்த்துப் போராடி வந்த முந்தைய தசாப்தங்களைப் போலல்லாமல், நாடு இப்போது ஒரு எதிர்கால கட்டத்தில் நுழைந்துள்ளது, அங்கு மூலக்கூறு நோயறிதல், மரபணு வரிசைமுறை மற்றும் தனிப்பயனாக்கப்பட்ட மருத்துவம் ஆகியவை சுகாதாரப் பராமரிப்பு விநியோகத்தில் மையமாகி வருகின்றன என்று டாக்டர் ஜிதேந்திர சிங் கூறினார். ஆய்வக ஆராய்ச்சியை நிஜ வாழ்க்கை மருத்துவ விளைவுகளுடன் இணைப்பதில் CDFD போன்ற நிறுவனங்கள் முக்கிய பங்கு வகிக்கின்றன என்று அவர் குறிப்பிட்டார்.
அரசாங்கத்தின் கொள்கை வழிகாட்டுதலை எடுத்துரைத்த அமைச்சர், பிரதமர் நரேந்திர மோடியின் கீழ் உயிரி தொழில்நுட்பம் மற்றும் சுகாதாரம் முன்னெப்போதும் இல்லாத முன்னுரிமையைப் பெற்றுள்ளன என்றும், செங்கோட்டையின் கொத்தளத்திலிருந்து மீண்டும் மீண்டும் வலியுறுத்தப்பட்டது என்றும் கூறினார். சுதந்திர தின உரையின் போது உயிரி-E3 கொள்கை அறிவிக்கப்பட்டதை அவர் நினைவு கூர்ந்தார், இது நாடு முழுவதும் உள்ள விஞ்ஞானிகள், தொடக்க நிறுவனங்கள் மற்றும் இளம் கண்டுபிடிப்பாளர்களிடையே பரவலான ஆர்வத்தைத் தூண்டிய ஒரு வினையூக்கியாக விவரித்தார்.
பெரிய அளவிலான மரபணு வரிசைமுறை, குழந்தை மரபணு நோய் திட்டங்கள் மற்றும் ஹீமோபிலியா போன்ற துறைகளில் முன்னோடிப் பணிகள் உள்ளிட்ட மரபணுவியல் தலைமையிலான முயற்சிகளில் இந்தியா விரைவான முன்னேற்றத்தைக் காண்கிறது என்று டாக்டர் ஜிதேந்திர சிங் குறிப்பிட்டார். இந்த முயற்சிகள் தனிப்பயனாக்கப்பட்ட சிகிச்சையின் சகாப்தத்திற்கு சுகாதார அமைப்பை தயார்படுத்துகின்றன, அங்கு ஒத்த நிலைமைகளைக் கொண்ட நோயாளிகளுக்கு வெவ்வேறு சிகிச்சை அணுகுமுறைகள் தேவைப்படலாம் என்றார்.
அரிய நோய்கள் குறித்துப் பேசுகையில், 2021 ஆம் ஆண்டில் இந்தியாவின் முதல் அரிய நோய்களுக்கான தேசியக் கொள்கை அறிமுகப்படுத்தப்பட்டது, அரசாங்கத்தின் அணுகுமுறையில் ஒரு பெரிய மாற்றத்தைக் குறித்தது என்றும், இது தொலைநோக்குப் பார்வை மற்றும் அறிவியல் உள்ளீடுகளுக்கான திறந்த தன்மையைப் பிரதிபலிக்கிறது என்றும் அமைச்சர் கூறினார். கண்டறிதல் மட்டும் போதாது என்றும், பாதிக்கப்பட்ட குடும்பங்களுக்கு நிலையான சிகிச்சையும் மலிவு விலையில் கிடைக்கச் செய்ய வேண்டும் என்றும் அவர் எடுத்துரைத்தார்.
ஆயுஷ் அமைச்சகம் மூலம் பாரம்பரிய முறைகளை நிறுவனமயமாக்குதல் மற்றும் ஒரு தடுப்பு சுகாதார கருவியாக யோகாவை உலகளவில் அங்கீகரிப்பது உள்ளிட்ட அரசாங்கத்தால் ஊக்குவிக்கப்படும் ஒருங்கிணைந்த சுகாதார மாதிரி குறித்தும் அமைச்சர் பேசினார். நவீன மருத்துவத்துடன் நல்வாழ்வு நடைமுறைகளை ஒருங்கிணைப்பது வாழ்க்கை முறை மற்றும் வளர்சிதை மாற்றக் கோளாறுகளை நிர்வகிப்பதில் நேர்மறையான விளைவுகளைக் காட்டியுள்ளது என்று அவர் கூறினார்.
இந்த விஜயத்தின் போது, டாக்டர் ஜிதேந்திர சிங், CDFD-யில் நடைபெற்று வரும் ஆராய்ச்சி மற்றும் புதுமை நடவடிக்கைகளை மதிப்பாய்வு செய்தார், மேலும் மரபணு வரிசைமுறை திட்டங்கள் மற்றும் பொது விழிப்புணர்வை நோக்கமாகக் கொண்ட வெளிநடவடிக்கை முயற்சிகள் போன்ற முயற்சிகளைப் பாராட்டினார். குடிமக்கள், குறிப்பாக இளைஞர்கள் அணுகக்கூடிய மொழியில் அறிவியலைத் தொடர்புகொள்வது, உயிரி தொழில்நுட்பத்தில் நம்பிக்கையையும் ஆர்வத்தையும் வளர்ப்பதற்கு அவசியம் என்று அமைச்சர் கூறினார்.
இந்தியாவின் வளர்ந்து வரும் உயிரி-பொருளாதாரத்தை எடுத்துரைத்த டாக்டர் ஜிதேந்திர சிங், பல ஆண்டுகளாக உயிரி தொழில்நுட்ப தொடக்க நிறுவனங்களின் எண்ணிக்கை பன்மடங்கு அதிகரித்துள்ளது என்றும், பொருளாதாரத்தில் இந்தத் துறையின் பங்களிப்பு கூர்மையான உயர்வைக் கண்டுள்ளது என்றும் கூறினார். உயிரி தொழில்நுட்ப ஆராய்ச்சி மற்றும் கண்டுபிடிப்பு கவுன்சில் (BRIC) உருவாக்கம் நிறுவனங்களுக்கிடையே ஒருங்கிணைப்பை வலுப்படுத்தியுள்ளது, இது அதிக தாக்கத்தை ஏற்படுத்தும் ஆராய்ச்சி மற்றும் தொழில்துறை ஒத்துழைப்புக்கு வழிவகுத்துள்ளது என்றும் அவர் கூறினார்.
தடுப்பூசிகள் மற்றும் தடுப்பு சுகாதாரப் பராமரிப்பில் இந்தியாவின் தலைமையை அமைச்சர் அடிக்கோடிட்டுக் காட்டினார், உள்நாட்டு கண்டுபிடிப்புகள் இப்போது தேசிய அளவில் பயன்படுத்தப்பட்டு உலகளவில் பகிரப்பட்டு வருகின்றன, இது உலக சுகாதாரப் பாதுகாப்பில் நாட்டின் பங்கை வலுப்படுத்துகிறது என்று கூறினார்.
தனது உரையை நிறைவு செய்த அமைச்சர், இந்திய மக்கள் தொகையில் கிட்டத்தட்ட 70 சதவீதம் பேர் 40 வயதுக்குக் குறைவானவர்களாக இருப்பதால், ஆரம்பகால நோயறிதல் மற்றும் தடுப்பு மூலம் சுகாதாரத்தில் முதலீடு செய்வது ஒரு தேசிய கட்டாயமாகும் என்று கூறினார். CDFD-யில் செய்யப்படும் பணிகள் குறித்து அவர் திருப்தி தெரிவித்தார், மேலும் இதுபோன்ற நிறுவனங்கள் ஆரோக்கியமான, வலிமையான மற்றும் எதிர்காலத்திற்குத் தயாராக இருக்கும் இந்தியாவை உருவாக்குவதற்கு அர்த்தமுள்ள பங்களிப்பைச் செய்கின்றன என்றும் கூறினார்.
திவாஹர்