பாதுகாப்புப் படைத் தலைமைத் தளபதி (சிடிஎஸ்), ஜெனரல் அனில் சௌகான், ஏப்ரல் 04, 2026 அன்று ஸ்ரீநகரில் உள்ள சினார் கார்ப்ஸின் கீழ் வரும் மூலோபாய முக்கியத்துவம் வாய்ந்த பகுதிகளைப் பார்வையிட்டார். இந்தப் பயணத்தின் போது, சிடிஎஸ் வடக்கு காஷ்மீரில் உள்ள எல்லைக் கட்டுப்பாட்டுக் கோடு நெடுகிலும் உள்ள பாதுகாப்புச் சூழல் மற்றும் செயல்பாட்டு நிலையை ஆய்வு செய்தார். மேலும், அந்தப் படைப்பிரிவின் முன்மாதிரியான செயல்பாட்டுத் தயார்நிலை, கோட்பாட்டு ஒருங்கிணைப்பு மற்றும் உறுதியான தொழில்முறை ஆகியவற்றைப் பாராட்டினார். பாரமுல்லாவில், எதிர்காலப் படைப் பயன்பாடு மற்றும் தொழில்நுட்பப் புகுத்தல் குறித்து அவருக்கு விளக்கப்பட்டது.
சினார் படைப்பிரிவின் அதிகாரிகளுக்கு ஆற்றிய தனது உரையில், போரின் தன்மை ஆழமான மாற்றத்திற்கு உள்ளாகி வருவதாகவும், இது ஒரு வலுவான மற்றும் ஒருங்கிணைந்த கட்டமைப்பை அடிப்படையாகக் கொண்ட, களம் சார்ந்த அணுகுமுறையிலிருந்து பல்களச் செயல்பாடுகளுக்கு (MDO) மாறுவதை அவசியமாக்குகிறது என்றும் அவர் எடுத்துரைத்தார். நிலம், வான், கடல், இணையம், விண்வெளி மற்றும் அறிவாற்றல் ஆகிய களங்களில் தடையற்ற ஒருங்கிணைப்பு, தீர்க்கமான முடிவுகளை அடைவதற்கு இன்றியமையாதது என்று வலியுறுத்தி, கூட்டுச் செயல்பாட்டின் முக்கியத்துவத்தை அவர் அடிக்கோடிட்டுக் காட்டினார். அனைத்துக் களங்களிலும் ஒத்திசைவான விளைவுகளை ஏற்படுத்துவதற்காக, எதிர்காலப் போருக்கான துரிதப்படுத்தப்பட்ட கூட்டுப் பயிற்சி, கோட்பாடுகளின் ஒத்திசைவு மற்றும் ஒன்றோடொன்று செயல்படக்கூடிய கட்டளை மற்றும் கட்டுப்பாட்டுக் கட்டமைப்புகளின் வளர்ச்சி ஆகியவற்றுக்கு அவர் அழைப்பு விடுத்தார்.
வளர்ந்து வரும் சவால்களை எதிர்கொள்வதற்கு, ஒருங்கிணைந்த முயற்சிகள் மூலம் தொழில்நுட்பத் தழுவல், அறிவாற்றல் மீள்திறன் மற்றும் கூட்டுத் தயார்நிலையை வளர்க்கும் ஒரு திட்டமிட்ட செயல்திட்டத்தின் அவசியத்தை முப்படைத் தலைமைத் தளபதி வலியுறுத்தினார். எதிர்பார்க்கப்படும் அச்சுறுத்தல்களுக்கான தயாரிப்பானது, தொலைநோக்குப் பார்வை, புதுமை, ஒரு ஒருங்கிணைந்த போரிடும் தத்துவம் மற்றும் ஒரு தேசம் முழுவதின் முயற்சி ஆகியவற்றில் வேரூன்றியிருக்க வேண்டும் என்று அவர் மீண்டும் வலியுறுத்தினார். மாறிவரும் பாதுகாப்புச் சவால்களை எதிர்கொள்வதில் செயல்பாட்டுத் தயார்நிலை மற்றும் மீள்திறனின் முக்கியத்துவத்தை அவர் எடுத்துரைத்தார்.
செயல்பாட்டுச் சிறப்பைத் தக்கவைத்துக் கொள்ளவும், கூட்டுறவை ஒரு வாழ்க்கை முறையாகக் கடைப்பிடிக்கவும், எதிர்கால மோதல்களின் முழு வீச்சையும் எதிர்கொள்ளத் தயாராக இருக்கவும் அனைத்துத் தரப்பினரையும் ஜெனரல் சௌஹான் வலியுறுத்தினார். மேலும், அவர் பாரமுல்லாவில் சிவில் நிர்வாகப் பிரதிநிதிகள், முக்கியப் பிரமுகர்கள் மற்றும் அதிகாரிகளுடன் கலந்துரையாடி, தேச நிர்மாணத்திற்கான முயற்சிகளை ஆய்வு செய்தார்.
திவாஹர்