நகராட்சி துறை அதிகாரிகள் நியமனத்தில் முறைகேடு தொடர்பாக வழக்குப்பதிவு செய்யும்படி, லஞ்ச ஒழிப்புத் துறைக்கு பிறப்பித்த உத்தரவை மறு ஆய்வு செய்யக் கோரி, திமுக முதன்மைச் செயலாளரும், முன்னாள் நகராட்சி துறை அமைச்சருமான கே.என்.நேரு தாக்கல் செய்த மனுவை சென்னை உயர் நீதிமன்றம் இன்று 26.10.2026 திங்கள் கிழமை தள்ளுபடி செய்தது.
கடந்த திமுக ஆட்சிக் காலத்தில் நகராட்சி நிர்வாக துறையில், 2,538 உதவி பொறியாளர்கள் மற்றும் இளநிலை பொறியாளர்கள் உள்ளிட்ட அதிகாரிகள் நியமனத்துக்கு ரூ.634 கோடி லஞ்சம் பெறப்பட்டுள்ளதாகவும், இது சம்பந்தமாக வழக்குப் பதிவு செய்யும்படி, தமிழ்நாடு காவல்துறை (DGP) இயக்குநருக்கு அமலாக்கத் துறை (ED – Enforcement Directorate) கடிதம் அனுப்பியிருந்தது.
இந்த கடிதத்தின் அடிப்படையில், வழக்குப்பதிவு செய்ய தமிழ்நாடு லஞ்ச ஒழிப்புத் துறைக்கு உத்தரவிடக் கோரி அதிமுக மாநிலங்களவை உறுப்பினர் வழக்குரைஞர் இன்பதுரை தாக்கல் செய்த வழக்கை விசாரித்த சென்னை உயர் நீதிமன்றம், அமலாக்கத் துறை கடிதத்தின் அடிப்படையில் உடனடியாக வழக்குப் பதிவு செய்ய லஞ்ச ஒழிப்புத் துறைக்கு கடந்த பிப்ரவரி மாதம் உத்தரவிட்டிருந்தது.
இதனிடையே, தனது தரப்பு வாதங்களை கேட்காமல் பிறப்பிக்கப்பட்ட இந்த உத்தரவை மறு ஆய்வு செய்யக் கோரி முன்னாள் அமைச்சர் கே. என்.நேரு தாக்கல் செய்த மனுவை, சென்னை உயர் நீதிமன்ற தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி.அருள்முருகன் அமர்வு விசாரித்தது.
முன்னாள் அமைச்சர் கே. என். நேரு தரப்பில், தனது தரப்பு வாதங்களை கேட்காமல் வழக்குப் பதிவு செய்ய உத்தரவிடப்பட்டதால் தனது உரிமை பாதிக்கப்பட்டுள்ளது. வழக்குப் பதிவு செய்ய பிறப்பித்த உத்தரவை மறு ஆய்வு செய்யக்கோரி முந்தைய ஆட்சியில் தாக்கல் செய்யப்பட்ட மனுவை, தற்போதைய அரசு வாபஸ் பெற முடியாது எனவும், அரசுக்கு அந்த அதிகாரம் இல்லை எனவும் வாதிடப்பட்டது.
அப்போது, தமிழ்நாடு அரசுத் தரப்பில், அதிகாரிகள் நியமன முறைகேடு தொடர்பாக ஆதாரங்களுடன் அமலாக்கத் துறை கடிதம் எழுதியும், முந்தைய திமுக அரசு, எந்த நடவடிக்கையும் எடுக்காமல், முன்னாள் அமைச்சர் கே. என். நேருவை பாதுகாத்தது. வழக்குப்பதிவு செய்யக் கோரிய வழக்கில், கே. என். நேருவுக்கு நோட்டீஸ் அனுப்பியும், அந்த அவகாசத்தை பயன்படுத்தாமல், பதிலளிக்க அவகாசம் வழங்கவில்லை என இந்த மறு ஆய்வு மனு தாக்கல் செய்யப்பட்டுள்ளது என வாதிடப்பட்டது.
அனைத்து தரப்பு வாதங்களையும் பதிவு செய்துகொண்ட நீதிபதிகள் தீர்ப்பை தேதி குறிப்பிடாமல் தள்ளிவைத்திருந்தனர். இந்நிலையில், இந்த வழக்கில் இன்று (26.10.2026, திங்கள்கிழமை) தீர்ப்பு அறிவித்த உயர் நீதிமன்ற நீதிபதிகள் முன்னாள் அமைச்சர் கே. என்.நேருவின் மனுவை தள்ளுபடி செய்து உத்தரவிட்டனர்.
–Dr.துரைபெஞ்சமின், BAMS.,
M.A.,SOCIOLOGY,
Ex. Honorary A.W.Officer, Govt Of India,
Editor & Publisher,
www.ullatchithagaval.com
Director, UTL MEDIA TEAM
editorutlmedia@gmail.com
இது தொடர்பான முந்தையச் செய்திகளுக்கு கீழ் காணும் இணைப்பை “கிளிக்” செய்யவும்.
https://www.ullatchithagaval.com/2026/09/08/123633/