ஐக்கிய அமெரிக்காவில் அமெரிக்க அதிபரின் நான்கு ஆண்டுப் பதவிக்காலத்தின் நடுவில் அதாவது இரண்டாவது ஆண்டின் இறுதியில் நடத்தப்படும் நாடாளுமன்றத் தேர்தல் அமெரிக்க இடைக்காலத் தேர்தல் (US Midterm Elections) என அழைக்கப்படுகிறது.
இடைக்காலத் தேர்தல்கள் (Midterm elections) என்பவை, ஒரு அதிபரின் நான்கு ஆண்டு பதவிக்காலத்தின் இடைப்பகுதியில், நவம்பர் மாதத்தின் முதல் திங்கட்கிழமைக்கு அடுத்து வரும் செவ்வாய்க்கிழமையன்று (தேர்தல் நாளில்) நடத்தப்படும் பொதுத் தேர்தல்கள் ஆகும்.
இந்த இடைக்காலத் தேர்தல்களில், ஐக்கிய அமெரிக்கப் பிரதிநிதிகள் சபையின் அனைத்து 435 இடங்களுக்கும், ஐக்கிய அமெரிக்க மேலவையின் (செனட்) 100 இடங்களில் மொத்தம் 35 இடங்களுக்கும் தேர்தல் நடைபெற்றது. இதில் 33 இடங்கள் வழக்கமான தேர்தலாகவும், 2 இடங்கள் சிறப்புத் தேர்தலாகவும் நடத்தப்பட்டன.
அமெரிக்காவில் நடைபெற்ற இந்த 2026-ஆம் ஆண்டு இடைக்காலத் தேர்தல்களில், ஜனநாயகக் கட்சி (Democratic party) பிரதிநிதிகள் சபை, மேலவை ஆகிய இரு அவைகளின் கட்டுப்பாட்டையும் கைப்பற்றி அமோக வெற்றி பெற்றுள்ளது.
இது அமெரிக்க அதிபர் டொனால்ட் டிரம்ப் மற்றும் அவரது குடியரசுக் கட்சிக்கு (Republican party) ஒரு பெரும் அரசியல் பின்னடைவாகும். எதிர்பாராத இந்த மாற்றத்தின் மூலம், பிரதிநிதிகள் சபை மற்றும் மேலவை ஆகிய இரண்டையும் ஜனநாயகக் கட்சியினர் தங்கள் வசப்படுத்தியுள்ளனர். இது குடியரசுக் கட்சியின் ஆதிக்கத்திற்கு முற்றுப்புள்ளி வைத்திருப்பதோடு, வாஷிங்டனில் புதிய அரசியல் மோதலுக்கு இது வழிவகுத்துள்ளது.
இந்த தேர்தல் முடிவுகளின்படி, 435 உறுப்பினர்களைக் கொண்ட பிரதிநிதிகள் சபையில், ஜனநாயகக் கட்சியினர் 228 இடங்களைக் கைப்பற்றியுள்ளனர்; இது பெரும்பான்மைக்குத் தேவையான 218 இடங்களை விட அதிகம். மேலவையில், குடியரசுக் கட்சியினர் 44 இடங்களைப் பெற்ற நிலையில், ஜனநாயகக் கட்சியினர் 54 இடங்களைக் கைப்பற்றியுள்ளனர். இன்னும் இரண்டு இடங்களுக்கான முடிவுகள் வெளியாக வேண்டியுள்ளன.
டெக்சாஸ், தென் கரோலினா, கன்சாஸ், அயோவா மற்றும் ஓஹியோ போன்ற, பாரம்பரியமாக குடியரசுக் கட்சியின் கோட்டைகளாகக் கருதப்பட்ட மாநிலங்களில் ஜனநாயகக் கட்சியினர் வெற்றிப் பெற்றுள்ளனர், இது அமெரிக்க அரசியலில் ஏற்பட்டுள்ள குறிப்பிடத்தக்க மாற்றத்தைக் காட்டுகிறது.
இந்தத் தேர்தல் முடிவுகள், டொனால்ட் டிரம்ப் நிர்வாகத்தின் பொருளாதார மற்றும் வெளியுறவுக் கொள்கைகளுக்கு எதிராக வாக்காளர்கள் மத்தியில் நிலவிய கடும் அதிருப்தியை வெளிப்படுத்துகின்றன. குறிப்பாக, பணவீக்கம் மற்றும் எரிபொருள் விலை உயர்வு போன்ற பொருளாதாரச் சிக்கல்கள், டொனால்ட் ட்ரம்ப் தலைமையிலான குடியரசுக் கட்சியின் பின்னடைவுக்கு முக்கிய காரணங்களாக அமைந்தன. ஈரான் உடனான அமெரிக்கா-இஸ்ரேல் போர் நீண்டகாலமாக நீடித்து வருவது, உலகளாவிய எரிசக்தி விநியோகத்தைப் பாதித்து, எரிபொருள் விலையை உயர்த்தியதும் தேர்தல் பிரச்சாரத்தில் ஒரு முக்கிய விவாதப் பொருளாக மாறியது.
ஜனநாயகக் கட்சி இரு அவைகளின் கட்டுப்பாட்டையும் பெற்றுள்ளதால், டொனால்ட் டிரம்ப் நிர்வாகத்தின் செயல்பாடுகளைக் கண்காணிக்கவும், நாடாளுமன்ற விசாரணைகளைத் தொடங்கவும், அமெரிக்க அதிபர் டொனால்ட் டிரம்ப் சட்ட முன்மொழிவுகள் மற்றும் நியமனங்களைத் தடுக்கவும் ஜனநாயகக் கட்சியினருக்கு அதிகாரம் கிடைத்துள்ளது. இருப்பினும், அமெரிக்க அதிபராக டொனால்ட் டிரம்ப் தொடர்ந்து பதவியில் நீடிப்பார்; அவர் தனது நிர்வாக அதிகாரங்களையும், சட்டங்களை நிராகரிக்கும் (வீட்டோ) உரிமையையும் தொடர்ந்து கொண்டிருப்பார்.
இந்நிலையில் அதிபரின் வெள்ளை மாளிகை ஒரு செய்தி அறிக்கையை வெளியிட்டுள்ளது.
கடைசி இரண்டு ஆண்டுகளில், அதிபர் டிரம்ப் செய்த அனைத்தையும் ஜனநாயகக் கட்சியினர் மாற்றியமைக்க முயற்சிப்பார்கள் — ஆனால் தோல்வியடைவார்கள். அதிபர் டிரம்ப் ஒருபோதும் போராடுவதை நிறுத்த மாட்டார் என்று அந்தச் செய்தி குறிப்பில் குறிப்பிடப்பட்டுள்ளது.
அவற்றின் விவரம் வருமாறு:
அவர் எல்லையைப் பாதுகாத்த பிறகு அதை மீண்டும் திறப்பது.
அவர் வரிகளைக் குறைத்து, சாதனை அளவிலான வளர்ச்சியை வழங்கிய பிறகு வரிகளை உயர்த்துவது.
நவீன வரலாற்றில் வன்முறைக் குற்றங்களில் மிகப்பெரிய வீழ்ச்சியை ஏற்படுத்திய பிறகு சட்ட அமலாக்கத்தை பலவீனப்படுத்துவது.
அவர் பெருமளவிலான நாடுகடத்தல்களை அமல்படுத்திய பிறகு, சட்டவிரோதக் குடியேறிகளால் நாட்டை நிரப்புவது.
அவர் அமெரிக்க எரிசக்தி சுதந்திரத்தை அடைந்த பிறகு, பசுமைப் புதிய ஒப்பந்தத்தை மீண்டும் உயிர்ப்பிப்பது.
அவர் சாதனை அளவிலான உற்பத்தியை அடைந்த பிறகு எரிசக்தி ஆதிக்கத்தை விட்டுக்கொடுப்பது.
அவர் காட்டுமிராண்டித்தனமான பழக்கத்தை முடிவுக்குக் கொண்டுவந்து குழந்தைகளைப் பாதுகாத்த பிறகு, சிறார்களுக்கு எதிரான திருநங்கை சிதைப்பை மீண்டும் கொண்டு வருவது.
அவர் இனம் சார்ந்த பன்முகத்தன்மை, சமத்துவம் மற்றும் உள்ளடக்கத்தை (DEI) நீக்கிய பிறகு அதை மீண்டும் கொண்டு வருவது.
அவர் தணிக்கை முறையை அகற்றிய பிறகு அதை மீண்டும் உருவாக்குவது.
அவர் விரயம், மோசடி மற்றும் முறைகேடுகளைக் கடுமையாக ஒடுக்கிய பிறகு, அவற்றின் கதவுகளை மீண்டும் திறப்பது.
குற்றவாளிகளான சட்டவிரோதக் குடியேறிகளை வெளியேற்றுவதற்கு முன்னுரிமை அளித்த பிறகு, அவர்களைப் பாதுகாப்பது.
பழமைவாத நீதிபதிகளை நியமித்த பிறகு, உச்ச நீதிமன்றத்தில் தனது நீதிபதிகளின் எண்ணிக்கையை அதிகரிப்பது.
முதல் இரண்டு தோல்வியுற்ற முயற்சிகளை விரைவாக முறியடித்த பிறகு, மற்றொரு பதவி நீக்கப் புரளியைத் தொடங்குவது.
இந்த முயற்சிகள் தோல்வியடையும்; அமெரிக்க மக்கள் ஏற்கனவே இந்தத் திட்டத்தை நிராகரித்துவிட்டனர். அதிபர் டிரம்பின் சாதனைகள் அவர்களால் அழிக்க முடியாத ஒரு முரண்பாடாகும்: எல்லைப் பாதுகாப்பு, பன்முகத்தன்மை, சமத்துவம் மற்றும் உள்ளடக்கம் (DEI) முடிவுக்கு வருதல், எரிசக்தி சுதந்திரம், நமது குழந்தைகளின் பாதுகாப்பு மற்றும் இன்னும் பல. அவரைப் பதவி நீக்கம் செய்வதற்கான முயற்சிகள், அவரது திட்டங்களைப் பின்வாங்கச் செய்வது, அல்லது அவரது நிர்வாகத்தின் வெற்றிகளைத் தலைகீழாக மாற்றுவது போன்றவை தீவிர இடதுசாரிகளின் முந்தைய முயற்சிகளைப் போலவே தோல்வியையே சந்திக்கும். அதிபர் டிரம்ப் ஒருபோதும் போராடுவதை நிறுத்த மாட்டார். இவ்வாறு அந்த வெள்ளை மாளிகை அறிக்கையில் குறிப்பிடப்பட்டுள்ளது.
ஆம், எத்தனையோ சர்வாதிகாரிகளை அமெரிக்கா இதுவரை சந்தித்திருக்கிறது. ஆனால், டொனால்ட் ட்ரம்பை போல மல்லாந்துப் படுத்துக் கொண்டு எச்சில் துப்பும் ஒரு பிடிவாதக்காரரை இதுவரை அமெரிக்கா சந்தித்ததே இல்லை. இனிமேலும் சந்திக்குமா? என்று தெரியவில்லை.
ஆக, இந்த தேர்தல் தோல்வியில் இருந்து எந்தப் பாடத்தையும் கற்றுக்கொள்ளும் மனநிலையில் அமெரிக்க அதிபர் டொனால்ட் டிரம்ப் இல்லை என்பது இதன் மூலம் வெளிப்படையாகவே தெரிகிறது. “இன்னும் கெட்டுப் போறேன் என்னடா பந்தயம் கட்ற” என்ற மனநிலையில் தான் அவர் இன்றும் இருக்கிறார். உலக நாடுகள் அனைத்தையும் தன் காலுக்கு கீழே கொண்டு வந்து விட வேண்டும். தன் கண் அசைவில் செயல்பட வைக்க வேண்டும் என்ற ஆணவத்தில் அவர் இருக்கிறார். அமெரிக்க அதிபர் டொனால்ட் ட்ரம்ப்பின் இத்தகைய பெரியண்ணன் தோரணையும், அவரது பிடிவாத குணமும்தான் இந்த தேர்தல் தோல்விக்கு அடிப்படைக் காரணம். ஆனால், அதை இந்த நிமிடம் வரை அவர் உணர மறுக்கிறார்.
வரலாற்று ரீதியாக, இடைக்காலத் தேர்தல்களில் அதிபரின் கட்சி நாடாளுமன்றத்தில் இடங்களை இழப்பதும், பெரும்பாலும் அதிபரின் எதிர்க்கட்சி நாடாளுமன்றத்தின் ஒரு அவையையோ அல்லது இரண்டு அவைகளையுமோ தங்கள் கட்டுப்பாட்டிற்குக் கொண்டு வருவதும் அமெரிக்க அரசியலில் வழக்கமான நடைமுறைதான் என்றாலும். இந்த 2026 இடைக்காலத் தேர்தல் முடிவு முற்றிலும் வித்தியாசமானதாக இருக்கிறது.
வரலாற்று ரீதியாக, அதிபர் தேர்தல்களை விட இடைக்காலத் தேர்தல்களில் வாக்காளர்களின் பங்களிப்பு குறைவாகவே இருக்கும். கடந்த 60 ஆண்டுகளில், அதிபர் தேர்தல்களில் சுமார் 50–60% வாக்காளர்கள் வாக்களித்த நிலையில், இடைக்காலத் தேர்தல்களில் வாக்களிக்கத் தகுதியுடையவர்களில் சுமார் 40% பேர் மட்டுமே வாக்களிப்பார்கள். ஆனால் அமெரிக்க வரலாற்றில் இதுவரை இல்லாத அளவிற்கு இந்த 2026 இடைக்கால தேர்தலில் மொத்தம் 69% வாக்காளர்கள் வாக்களித்துள்ளனர்.
மொத்த வாக்குகள்: தோராயமாக 124.3 மில்லியன் (12.43 கோடி) மக்கள் தங்களது வாக்குகளைப் பதிவு செய்துள்ளனர். இது முந்தைய 2022 இடைக்காலத் தேர்தலின் மொத்த எண்ணிக்கையை விட (112 மில்லியன்) அதிகமாகும்.
தேர்தல் நாளுக்கு முன்பாகவே 51 மில்லியனுக்கும் அதிகமான அமெரிக்கர்கள் தங்களின் வாக்குகளை அஞ்சல் மூலமாகவும், நேரடியாகவும் பதிவுச் செய்திருந்தனர். இதில் சுமார் 23 மில்லியனுக்கும் அதிகமான வாக்குகள் அஞ்சல் வழியாகப் பெறப்பட்டவை ஆகும்.
அஞ்சல் வாக்குகளுக்குக் கூடுதல் கட்டுப்பாடுகளை விதிக்க முயன்ற டிரம்ப் நிர்வாகத்தின் புதிய விதிகளை (வங்கி/அஞ்சல் உறை வழிகாட்டுதல்கள் மற்றும் வாக்காளர் பட்டியல் சரிபார்ப்புத் திட்டம்) அமெரிக்க உச்ச நீதிமன்றம் தடுத்து நிறுத்தியது. இதனால் முந்தைய 2024 பொதுத் தேர்தலைப் போலவே மாநிலங்களின் தற்போதைய எளிய விதிகளின்படியே அஞ்சல் வாக்குப்பதிவு தடையின்றி நடைபெற்றது.
அஞ்சல் சேவைக்கான ‘சிறப்பு நடவடிக்கைகள்’: அஞ்சல் வாக்குகள் தாமதமின்றி தேர்தல் அதிகாரிகளைச் சென்றடைவதை உறுதி செய்ய, அமெரிக்க அஞ்சல் துறை (USPS) அக்டோபர் 24 முதல் கூடுதல் விநியோகங்கள் மற்றும் சிறப்புப் பிக்-அப் போன்ற “அதிசய நடவடிக்கைகளை” (Extraordinary Measures) நாடு முழுவதும் செயல்படுத்தியது.
அமெரிக்கா அதிபர் டொனால்ட் டிரம்ப்பின் இந்த இடைக்கால தேர்தல் தோல்விக்கு கீழ்காணும் நிகழ்வுகளையும் சுட்டிக் காண்பிக்கின்றனர்.
டிரம்ப் நிர்வாகம் சிலிக்கான் பள்ளத்தாக்குடன் கைகோர்த்து, செயற்கை மீயறிவு (ASI) வளர்ச்சியை ஊக்குவித்தது. செயற்கை பொது நுண்ணறிவு (AGI) மூலம் எதிர்காலத்தில் ஏற்படக்கூடிய வேலை இழப்புகள், தரவு மையங்களின் கட்டுமானம், சுற்றுச்சூழல் பாதிப்புகள் மற்றும் ASI ஏற்படுத்தும் இருப்பு சார்ந்த ஆபத்து ஆகியவற்றிற்கு எதிராக பொதுமக்களிடமிருந்து கடும் எதிர்ப்பு எழுந்துள்ளது.
டிரம்பின் தேசியவாத சித்தாந்தத்துடன் ஒத்துப்போகும் வகையில், ஒன்ராறியோ ஏரி (“லேக் அமெரிக்கா”) மற்றும் மெக்சிகோ வளைகுடா (“கல்ஃப் ஆஃப் அமெரிக்கா”) ஆகியவற்றின் பெயர்கள் உட்பட, இடப் பெயர்கள் மாற்றப்பட்டன. அதே நேரத்தில், ஜனநாயகக் கட்சியினர் இந்த மாற்றங்களை ஒரு கவனச்சிதறல் என்று முத்திரை குத்தினர்.
இடைக்காலத் தேர்தல்களின் போது ஆளும் கட்சிக்கு எதிர்பார்க்கப்படும் வரலாற்று இழப்புகளுக்கு முன்னதாக, தங்கள் கட்சி ஆட்சியைத் தக்கவைத்துக் கொள்வதற்கான வாய்ப்புகளை அதிகரிக்க, பத்தாண்டுகளின் மத்தியில் அரிதான தொகுதி மறுவரையறையை அமல்படுத்துமாறு குடியரசுக் கட்சி தலைமையிலான மாநிலங்களை டிரம்ப் வலியுறுத்தியது. இது பரஸ்பர தொகுதி மறுவரையறைக்கு வழிவகுத்தது. ஏப்ரல் 2026-ல், லூசியானா எதிர் கல்லாய்ஸ் வழக்கில், 1965-ஆம் ஆண்டின் வாக்குரிமைச் சட்டத்தின் சில பகுதிகள் அரசியலமைப்பிற்கு முரணானவை என்று டிரம்ப் நிர்வாகத்திற்கு எதிராக அமெரிக்க உச்ச நீதிமன்றம் தீர்ப்பளித்தது.
டிரம்ப் நிர்வாகம் குடியரசுக் கட்சியின் பிரச்சார விளம்பரங்களுக்கு நிதியளிக்க மில்லியன் கணக்கான வரி செலுத்துவோர் பணத்தைப் பயன்படுத்தியது, இருப்பினும் பின்னர் அதிபர் டிரம்பின் சூப்பர் PAC-இன் பணத்தைப் பயன்படுத்தத் தொடங்கியது.
பகுப்பாய்வாளர்கள் இந்த முடிவுகளை “தலைமுறை அளவிலான தாக்கம்”, “நீல சுனாமி”, “டிரம்ப் சகாப்தத்தின் முடிவு”, மற்றும் அமெரிக்க அரசியலில் டொனால்ட் டிரம்பின் சித்தாந்தம் “முற்றிலும் செயலிழந்த ஒரு அரசியல் சக்தி” என்று வர்ணிக்கின்றனர்.
எது எப்படியோ; எதிர்மறைச் சிந்தனையாளும், சொல்லாலும், செயலாலும், கடமைகள் தவறியதாலும் தன் நாட்டு மக்களுக்கும்; பிற நாட்டு மக்களுக்கும் தொடர்ந்து துரோகங்களை செய்ததின் விளைவு தான் இந்த இடைக்கால தேர்தலில் அமெரிக்க அதிபர் டொனால்ட் டிரம்ப் மிகப் பெரிய பின்னடைவை சந்தித்துள்ளார்.
இதில் பெரிய கொடுமை என்னவென்றால், “அமைதிக்கான நோபல் பரிசு” இவருக்கு வழங்க வேண்டும் என்று இவர் அடம் பிடித்தது தான். இந்த நூற்றாண்டின் மிகப்பெரிய நகைச்சுவை.
-Dr.துரைபெஞ்சமின், BAMS.,
M.A.,SOCIOLOGY,
Ex. Honorary A.W.Officer, Govt Of India,
Editor & Publisher,
www.ullatchithagaval.com
Director, UTL MEDIA TEAM
editorutlmedia@gmail.com