மத்திய வர்த்தகம் மற்றும் தொழில்துறை அமைச்சர் திரு பியூஷ் கோயல், ஜி20 வர்த்தக அமைச்சர்கள் கூட்டத்தில் கலந்துகொள்வதற்காக அமெரிக்காவின் மில்வாக்கி நகருக்கு வருகை தந்தார். அவர் வந்தடைந்ததும், சிகாகோவில் உள்ள இந்தியத் துணைத் தூதரகத்தின் தூதர் டாக்டர் எம். ஆனந்த் பிரகாஷ் அவரை வரவேற்றார்.
தேசிய உற்பத்தியாளர்கள் சங்கம் (NAM) நடத்திய வணிக வட்டமேசை மாநாட்டில், திரு பியூஷ் கோயல், அமெரிக்காவின் முன்னணி உற்பத்தி மற்றும் தொழில்நுட்ப நிறுவனங்களின் தலைமைச் செயல் அதிகாரிகள் மற்றும் மூத்த நிர்வாகிகளுடன் கலந்துரையாடினார். NAM, முன்னணி அமெரிக்க உற்பத்தி நிறுவனங்களில் கணிசமான பங்கைப் பிரதிநிதித்துவப்படுத்துவதோடு, சுமார் 3 டிரில்லியன் டாலர் மதிப்பிலான அமெரிக்க உற்பத்தி மொத்த உள்நாட்டு உற்பத்திக்கு குறிப்பிடத்தக்க பங்களிப்பையும் அளிக்கிறது.
இந்தக் கலந்துரையாடலின் போது, இந்தியா-அமெரிக்கா பொருளாதார உறவானது ஒரு பாரம்பரிய வர்த்தக உறவைத் தாண்டி, முதலீடு, உற்பத்தி, தொழில்நுட்பம், புத்தாக்கம், வலுவான விநியோகச் சங்கிலிகள் மற்றும் இரு நாடுகளிலும் உயர் மதிப்புத் திறன்களை உருவாக்குதல் ஆகியவற்றை அதிகளவில் உள்ளடக்கி வருகிறது என்று திரு பியூஷ் கோயல் எடுத்துரைத்தார்.
தலைமைச் செயல் அதிகாரிகள் மற்றும் மூத்த நிர்வாகிகள், இந்தியாவில் உருவாகி வரும் வாய்ப்புகள் குறித்தும், நாட்டில் கூட்டாண்மைகளை விரிவுபடுத்துவது தொடர்பான தங்கள் நிறுவனங்களின் கண்ணோட்டங்கள் குறித்தும் தங்கள் கருத்துக்களைப் பகிர்ந்து கொண்டனர். இந்தியாவில் நிறுவனங்களின் செயல்பாடுகள், விரிவாக்கம் மற்றும் முதலீடுகளுக்கு இந்திய அரசு உதவத் தயாராக உள்ளது என்று திரு பியூஷ் கோயல் தெரிவித்தார்.
திரு பியூஷ் கோயல், ராக்வெல் ஆட்டோமேஷனின் உலகளாவிய தலைமையகத்தில் பிசினஸ் ரவுண்ட்டேபிள் (பி.ஆர்.டி) மற்றும் என்.ஏ.எம் இணைந்து நடத்திய வரவேற்பு நிகழ்ச்சியிலும் கலந்துகொண்டார். அவர் மற்ற ஜி20 நாடுகளின் வர்த்தக அமைச்சர்கள் மற்றும் அமெரிக்க நிறுவனங்களின் மூத்த வணிகத் தலைவர்களுடன் கலந்துரையாடினார்.
எம்.பிரபாகரன்