மத்திய வேளாண்மை மற்றும் விவசாயிகள் நலத்துறை அமைச்சர் திரு சிவராஜ் சிங் சௌஹான், நெதர்லாந்து நாட்டின் வேளாண்மை, மீன்வளம், உணவுப் பாதுகாப்பு மற்றும் இயற்கைத்துறை அமைச்சர் திரு சில்வியோ எர்கென்ஸுடன் 2026 செப்டம்பர் 28 அன்று புது தில்லியில் இருதரப்புப் பேச்சுவார்த்தை நடத்தினார்.
வேளாண் துறையில் நடைபெற்று வரும் ஒத்துழைப்பை மீளாய்வு செய்வதிலும், புதிய ஒத்துழைப்புத் துறைகளை ஆராய்வதன் மூலம் வேளாண் ஒத்துழைப்பை வலுப்படுத்துவதிலும் இந்தக் கூட்டம் கவனம் செலுத்தியது. நவீன தொழில்நுட்பம், புத்தாக்கம் மற்றும் அறிவுப் பரிமாற்றம் ஆகியவற்றின் மூலம் உற்பத்தித்திறனை மேம்படுத்துவதற்கான தங்களது உறுதியை இரு தரப்பினரும் மீண்டும் வலியுறுத்தினர்.
வேளாண்மை மற்றும் தோட்டக்கலைத் துறைகளில் 25 சிறப்பு மையங்களை (CoEs) நிறுவுவதில் ஏற்பட்டுள்ள முன்னேற்றம் குறித்து இரு தரப்பினரும் விவாதித்தனர். மேலும், திறம்படச் செயல்படுத்துவதற்கான தெளிவான கட்டமைப்பிற்காக, ஒத்துழைப்பின் முக்கிய பகுதிகளை கோடிட்டுக் காட்டும் ஒரு செயல் திட்டத்தின் மூலம் விதைத்துறையில் ஒத்துழைப்பை ஆராய இரு தரப்பினரும் ஒப்புக்கொண்டனர்.
வேளாண் புத்தாக்கத் துறையில், இரு நாடுகளும் இத்துறையில் அடைந்துள்ள குறிப்பிடத்தக்க முன்னேற்றங்களையும் மேம்பாடுகளையும் அங்கீகரித்து, ஒத்துழைப்புக்கான சாத்தியமான துறைகளைக் கண்டறிவது குறித்து இரு தரப்பினரும் விவாதித்தனர்.
வேளாண்மை அமைச்சர் மட்டுமின்றி, வேளாண்மை, மீன்வளம், உணவுப் பாதுகாப்பு மற்றும் இயற்கை அமைச்சகத்தின் தலைமை இயக்குநர் திரு. மார்டன் வான் டென் பெர்க் மற்றும் பிற மூத்த அதிகாரிகளும், தூதர் திருமதி. மரிசா ஜெரார்ட்ஸ் மற்றும் இந்தியாவிலுள்ள நெதர்லாந்து இராச்சியத் தூதரகத்தின் பிற அதிகாரிகளும் டச்சு தூதுக்குழுவில் இடம்பெற்றிருந்தனர்.
இந்தியத் தரப்பில், வேளாண்மை மற்றும் விவசாயிகள் நலத்துறையின் செயலாளர் திரு. ஆதிஷ் சந்திரா, வேளாண்மை மற்றும் விவசாயிகள் நலத்துறையின் செயலாளர் டாக்டர் எம்.எல். ஜாட் மற்றும் பிற மூத்த அதிகாரிகள் இடம்பெற்றிருந்தனர்.
எம்.பிரபாகரன்