மத்திய வேளாண்மை, விவசாயிகள் நலன் மற்றும் ஊரக வளர்ச்சித் துறை அமைச்சர் திரு சிவராஜ் சிங் சௌஹான், வெள்ளிக்கிழமை அன்று புது தில்லியில் உள்ள கிருஷி பவனில் வேளாண்மைத் துறையின் ஒட்டுமொத்த நிலை குறித்து ஒரு உயர் மட்ட, விரிவான ஆய்வை நடத்தினார். சமீபத்தில் ஏற்பட்ட அதிக மழை, கனமழை, ஆலங்கட்டி மழை மற்றும் பிற மோசமான வானிலை காரணமாக பல மாநிலங்களில் விவசாயிகளுக்கு ஏற்படக்கூடிய இழப்புகள் குறித்து இந்த கூட்டத்தில் விரிவாக கவனம் செலுத்தப்பட்டது. விவசாயிகளின் உடனடித் தேவைகள், காப்பீட்டுக் கோரிக்கைகளைச் சமர்ப்பிக்கும் செயல்முறை மற்றும் நிவாரண வழிமுறைகளின் செயல்பாடு குறித்தும் விரிவான விவாதங்கள் நடைபெற்றன. ஆய்வுக்குப் பிறகு செய்தியாளர்களிடம் பேசிய திரு சௌஹான், அரசின் கவனம் உற்பத்தியுடன் மட்டும் நின்றுவிடவில்லை என்றும், பயிர் சேதத்தை அறிவியல் பூர்வமாக மதிப்பிடுவது, காப்பீட்டுக் கோரிக்கைகளை முறையாகத் தீர்ப்பது மற்றும் விவசாயிகளுக்கு உரிய நேரத்தில் உதவி வழங்குவது வரையிலும் நீட்டிக்கப்பட்டுள்ளது என்றும் தெளிவாகக் கூறினார்.
பல மாநிலங்களில் வானிலை நிச்சயமற்ற தன்மை, பயிர் சேத அபாயம் மற்றும் விவசாயிகளுக்கு ஆதரவு அளிப்பதற்கான அவசரத் தேவை ஆகியவை முக்கியக் கவலைகளாக உருவெடுத்துள்ள ஒரு காலகட்டத்தில், மத்திய வேளாண்மை அமைச்சரின் வழிகாட்டுதலின் பேரில் இந்த ஆய்வுக் கூட்டம் கூட்டப்பட்டது. விவசாயிகளுக்கு உரிய நேரத்தில் போதுமான ஆதரவு கிடைப்பதை உறுதி செய்வதற்காக, கொள்கை நடவடிக்கைகள், நிவாரண வழிமுறைகள் மற்றும் மத்திய அரசின் பல்வேறு திட்டங்களின் சென்றடைதல் ஆகியவை அனைத்து மட்டங்களிலும் திறம்பட ஒருங்கிணைக்கப்படுவதை உறுதி செய்வதே இதன் நோக்கமாகும்.
பயிர் இழப்பு மற்றும் காப்பீட்டுக் கோரிக்கைகளின் அறிவியல் மதிப்பீட்டிற்கு சிறப்பு முக்கியத்துவம் அளிக்கப்படுகிறது.
கூட்டத்தின் போது, விவசாயிகளுக்கு உதவி தேவைப்படும் இடங்களில் மாநில அரசுகளுடனான ஒருங்கிணைப்பை வலுப்படுத்த வேண்டும் என வேளாண் செயலாளர், வேளாண் ஆணையர் மற்றும் கூட்டத்தில் இருந்த அனைத்து மூத்த அதிகாரிகளுக்கும் திரு. சௌஹான் அறிவுறுத்தினார். பயிர் அறுவடைப் பரிசோதனைகள் உடனடியாக நடத்தப்பட வேண்டும், இழப்புகள் அறிவியல் பூர்வமாக மதிப்பிடப்பட வேண்டும், மேலும் தாமதமின்றி உடனடி நிவாரணம் வழங்கப்பட வேண்டும் என்றும் அவர் வலியுறுத்தினார். கனமழை, ஆலங்கட்டி மழை அல்லது பிற மோசமான வானிலையால் பாதிக்கப்பட்ட பகுதிகளில், எந்தவொரு விவசாயியும் நிவாரணத்திற்காகக் காத்திருக்க வேண்டிய கட்டாயத்திற்கு உள்ளாகாத வகையில், கள அளவில் காலவரையறைக்குட்பட்ட நடவடிக்கை அவசியம் என்றும் அவர் கூறினார்.
பயிர் அறுவடை சோதனைகள் முறையாக மேற்கொள்ளப்படுவதற்கும், இழப்புகள் துல்லியமாக மதிப்பிடப்படுவதற்கும், காப்பீட்டுக் கோரிக்கைகள் சரியான மற்றும் அறிவியல் பூர்வமான முறையில் தயாரிக்கப்படுவதற்கும், மாநில அரசுகளுடன் உடனடியாகத் தொடர்பு மற்றும் ஒருங்கிணைப்பை ஏற்படுத்த வேண்டும் என்று திரு சிவராஜ் சிங் சௌஹான் அனைத்து அதிகாரிகளுக்கும் அறிவுறுத்தினார். “விவசாயிகள் இழப்புகளைச் சந்தித்திருந்தால், நமது விவசாய சகோதர சகோதரிகளுக்கு நாம் ஆதரவளிக்கும் வகையில், அவர்களுடைய காப்பீட்டுக் கோரிக்கைகள் முறையாகவும் அறிவியல் பூர்வமாகவும் தயாரிக்கப்பட வேண்டும்,” என்று அவர் கூறினார்.
வரும் நாட்களில் மேலும் இரண்டு மேற்கு திசை காற்றழுத்தத் தாழ்வுகள் ஏற்பட வாய்ப்புள்ளதாக இந்திய வானிலை ஆய்வு மையம் (IMD) சுட்டிக்காட்டியுள்ளதாகவும் அவர் தெரிவித்தார். இதைக் கருத்தில் கொண்டு, விவசாயிகளுக்கு என்னென்ன அறிவுரைகள் வழங்க வேண்டும் என்பது குறித்து விரிவான விவாதங்கள் நடத்தப்பட்டு, பரந்த அளவில் தேவையான அறிவுறுத்தல்கள் வழங்கப்பட்டுள்ளன.
மோசமான வானிலை, வானிலை முன்னறிவிப்புகள் மற்றும் இடர் மேலாண்மை
வரும் நாட்களில் ஏற்படக்கூடிய வானிலை தொடர்பான அபாயங்களுக்கு ஏற்ப ஆயத்தப் பணிகளை மேற்கொள்ளும் வகையில், வானிலை முன்னறிவிப்புகள் மற்றும் பயிர்களின் தற்போதைய நிலை குறித்து இக்கூட்டத்தில் விரிவாக ஆய்வு செய்யப்பட்டது. விவசாயிகளுக்கு உரிய நேரத்தில் ஆலோசனை, உதவி மற்றும் பாதுகாப்பு கிடைப்பதை உறுதிசெய்யும் ஒரு விரிவான செயல் திட்டத்தை வகுப்பதற்கு, வேளாண்மைத் துறை, மாநில அரசுகள் மற்றும் தொடர்புடைய அனைத்து நிறுவனங்களும் ஒன்றிணைந்து செயல்பட வேண்டும் என்று திரு. சௌஹான் குறிப்பிட்டார்.
வேளாண் துறையின் நோக்கம் உற்பத்தியோடு மட்டும் நின்றுவிடாமல், விவசாயிகளின் பாதுகாப்பு, வருமான நிலைத்தன்மை மற்றும் உரிய நேரத்தில் வழங்கப்படும் ஆதரவு ஆகியவற்றையும் உள்ளடக்கியதாக இருக்க வேண்டும் என்று மத்திய அமைச்சர் தெளிவுபடுத்தினார். விவசாயிகள் போதுமான அளவு பாதுகாக்கப்படுவதை உறுதி செய்வதற்காக, பயிர் நிலவரங்கள், வானிலை அபாயங்கள், கொள்முதல் தயார்நிலை மற்றும் நிவாரண வழிமுறைகள் ஆகியவற்றுக்கு இடையே சிறந்த ஒருங்கிணைப்பை ஏற்படுத்த வேண்டியதன் அவசியத்தையும் அவர் வலியுறுத்தினார்.
பருப்பு வகைகள் திட்டத்தில் தற்சார்பு, குறைந்தபட்ச ஆதரவு விலை (MSP) மற்றும் பெருவாரியான உற்பத்தியைக் கொள்முதல் செய்தல்
வரும் நாட்களில் கோதுமை மற்றும் நெல் கொள்முதல் தொடங்கவுள்ளதாகவும், இந்த பருவத்தில் ராபி பயிர்கள் அமோக விளைச்சலைக் கொடுத்துள்ளதாகவும் திரு சௌஹான் தெரிவித்தார். இதன் விளைவாக, நாட்டில் கோதுமை, நெல் மற்றும் அரிசி போதுமான கையிருப்பில் உள்ளன, மேலும் பற்றாக்குறை இல்லை. கோதுமை மற்றும் நெல் கொள்முதல் தொடரும் அதே வேளையில், பருப்பு வகைகளில் அதிக கவனம் செலுத்தப்படும் என்று அவர் கூறினார். “விவசாயிகள் தாங்கள் விரும்பும் அளவுக்கு துவரம் பருப்பு, மசூர் பருப்பு மற்றும் உளுந்து ஆகியவற்றை விற்கலாம், நாங்கள் அதைக் கொள்முதல் செய்வோம்,” என்று அவர் கூறினார்.
பயறு வகைகளின் கொள்முதல், மாநில அரசுகளால் மட்டுமல்லாமல், இந்திய தேசிய வேளாண் கூட்டுறவு சந்தைப்படுத்தல் கூட்டமைப்பு (NAFED) மற்றும் தேசிய கூட்டுறவு நுகர்வோர் கூட்டமைப்பு (NCCF) போன்ற முகமைகள் மூலமாகவும் மேற்கொள்ளப்படும் என்றும், இதன்மூலம் விவசாயிகள் குறைந்தபட்ச ஆதரவு விலைக்கு (MSP) கீழே விற்க நிர்பந்திக்கப்படாமல், தங்களது விளைபொருட்களுக்கு நியாயமான ஊதியம் பெறுவதை உறுதிசெய்ய முடியும் என்றும் மத்திய வேளாண் அமைச்சர் தெளிவுபடுத்தினார்.
பருப்பு வகைகள் தன்னிறைவு இயக்கத்தின் முன்னேற்றத்தை ஆய்வு செய்த திரு. சௌஹான், துவரம் பருப்பு, உளுந்து மற்றும் மசூர் பருப்பு போன்ற முக்கியப் பருப்பு வகைகளின் உற்பத்தியை விரிவுபடுத்தவும், சாகுபடிப் பரப்பை அதிகரிக்கவும், குறைந்தபட்ச ஆதரவு விலை (MSP) அடிப்படையிலான கொள்முதல் வழிமுறைகளை வலுப்படுத்தவும் வேண்டியதன் அவசியத்தை வலியுறுத்தினார். பருப்பு உற்பத்தியில் நாட்டைத் தன்னிறைவு அடையச் செய்வது, இறக்குமதியைச் சார்ந்திருப்பதைக் குறைப்பது மற்றும் விவசாயிகளின் வருமானத்தை அதிகரிப்பது ஆகியவையே இந்த இயக்கத்தின் நோக்கம் என்று அவர் கூறினார். இந்த இலக்குகளை அடைவதற்காக, கள அளவில் உறுதியான செயல் திட்டங்கள் தயாரிக்கப்பட்டு வருவதாகவும் அவர் மேலும் தெரிவித்தார்.
அளவுடன் தரத்திலும் கவனம் செலுத்துங்கள், உயர் மதிப்புக்காகப் பிரச்சாரம் செய்யுங்கள்.
வேளாண் கொள்கையானது இனி அளவை அதிகரிப்பதில் மட்டும் கவனம் செலுத்தாமல், தரத்தை மேம்படுத்துவதற்கும் சமமான முக்கியத்துவம் அளிக்கும் என்று மத்திய வேளாண் அமைச்சர் தெளிவுபடுத்தினார். அதன் உயர்ந்த தரம் காரணமாக சந்தையில் ₹400-க்கும் அதிகமான கூடுதல் விலைக்கு விற்கப்படும் மத்தியப் பிரதேசத்தின் ‘ஷர்பதி’ கோதுமையை அவர் உதாரணமாகக் குறிப்பிட்டார்.
விவசாயிகள் குறைந்தபட்ச ஆதரவு விலையை விட அதிக விலையைப் பெறும் வகையில், சிறந்த பயிர் இரகங்கள், உயிர்ச்சத்து செறிவூட்டப்பட்ட பயிர்கள் மற்றும் உயர்தர தானியங்களை ஊக்குவிக்க வேண்டியதன் அவசியத்தை அவர் வலியுறுத்தினார். “நாங்கள் நிச்சயமாக உற்பத்தியை அதிகரிப்போம், ஆனால் அளவோடு சேர்த்து தரத்தை எவ்வாறு மேம்படுத்துவது என்பது குறித்தும் பிரச்சாரங்களை மேற்கொள்வோம். சிறந்த இரகங்களும் செறிவூட்டப்பட்ட பயிர்களும் விவசாயிகளுக்கு அதிக விலையைப் பெற்றுத் தரும், எனவே நாம் இரகத் தேர்வு மற்றும் தர மேம்பாட்டில் கவனம் செலுத்த வேண்டும்,” என்று திரு சௌஹான் கூறினார்.
விக்சித் க்ரிஷி சங்கல்ப் அபியான், பிராந்திய மாநாடுகள் மற்றும் பயிர் வாரியான சாலை வரைபடங்கள்
திரு சிவராஜ் சௌஹான், முன்பு போலவே விவசாயிகளுக்கு அறிவியல் ஆலோசனைகள், மேம்பட்ட தொழில்நுட்பங்கள் மற்றும் பிராந்தியத்திற்கேற்ற வேளாண் வழிகாட்டுதல்களை வழங்குவதற்காக தேசிய அளவில் செயல்படுத்தப்படவுள்ள வரவிருக்கும் ‘விக்சித் கிருஷி சங்கல்ப் அபியான்’ திட்டத்திற்கான ஆயத்தப் பணிகளையும் ஆய்வு செய்தார். இந்தத் திட்டம் வெறும் சம்பிரதாயமான ஒன்றாக மட்டும் இருந்துவிடாமல், கள அளவில் நடைமுறைக்கு உகந்த மற்றும் பயனுள்ள விளைவுகளை அளிக்க வேண்டும் என்று அவர் வலியுறுத்தினார். இது, விவசாயிகள் விதைப்பதற்கு முன்பாகவே சரியான பயிர்கள், பொருத்தமான இரகங்கள் மற்றும் தகுந்த வேளாண் நடைமுறைகளைத் தேர்ந்தெடுக்க உதவும்.
முன்னதாக, காரிஃப் பயிர்களுக்கான ஆயத்தப் பணிகள் புது தில்லியில் நடைபெற்ற ஒரே கூட்டத்தில் விவாதிக்கப்பட்டதாக அவர் குறிப்பிட்டார். இருப்பினும், தற்போது இந்த அணுகுமுறைக்கு பதிலாக, வடக்கு, தெற்கு, மேற்கு, கிழக்கு மற்றும் மலை மாநிலங்கள் (வடகிழக்கு உட்பட) ஆகிய ஐந்து மண்டலங்களில் பிராந்திய மாநாடுகள் நடத்தப்படுகின்றன. ஏப்ரல் 7 அன்று ஜெய்ப்பூரிலும், ஏப்ரல் 17 அன்று லக்னோவிலும், ஏப்ரல் 24 அன்று ஒடிசாவிலும் மூன்று பிராந்திய மாநாடுகள் திட்டமிடப்பட்டுள்ளதாகவும், மேலும் இரண்டு மாநாடுகளுக்கான தேதிகள் விரைவில் இறுதி செய்யப்படும் என்றும் அவர் அறிவித்தார்.
இந்த மாநாடுகளில் அரசு அதிகாரிகள் மட்டுமின்றி, இந்திய வேளாண் ஆராய்ச்சிக் கழகத்தின் (ICAR) விஞ்ஞானிகள், வேளாண் வல்லுநர்கள், வெற்றிகரமான விவசாயிகள், விவசாய உற்பத்தியாளர் அமைப்புகள் மற்றும் ஆராய்ச்சி, மதிப்புக்கூட்டல், பதப்படுத்துதல், சந்தைப்படுத்துதல் ஆகியவற்றில் குறிப்பிடத்தக்க பங்களிப்பை வழங்கிய தனியார் துறைப் பிரதிநிதிகளும் கலந்துகொள்வார்கள்.
விதை முதல் சந்தை வரையிலான முழு வேளாண் மதிப்புச் சங்கிலியிலும், ஒவ்வொரு கட்டத்திலும் விவசாயிகளுக்கு ஆதரவு கிடைப்பதை உறுதி செய்வதற்காக அரசு வியூகங்களை வகுத்து வருவதாக திரு சௌஹான் கூறினார். மேலும், ஒவ்வொரு முக்கியப் பயிருக்கும் ‘பயிர் அடிப்படையிலான செயல்திட்டமும்’, ஒவ்வொரு மாநிலத்திற்கும் ‘மாநில அடிப்படையிலான வேளாண் செயல்திட்டமும்’ தயாரிக்கப்படும் என்றும் அவர் குறிப்பிட்டார். சோயாபீன்ஸ், மக்காச்சோளம் மற்றும் தேங்காய் போன்ற பயிர்கள் குறித்து, உற்பத்தியை அதிகரிப்பது, தரத்தை மேம்படுத்துவது, நோய்களைக் கட்டுப்படுத்துவது மற்றும் தூய்மையான நடவுப் பொருட்கள் கிடைப்பதை உறுதி செய்வது ஆகியவற்றில் கவனம் செலுத்தி, விரிவான விவாதங்கள் ஏற்கனவே தொடங்கிவிட்டன.
அரசின் உறுதிப்பாட்டை மீண்டும் வலியுறுத்திய திரு சௌஹான், மத்திய அரசு விவசாயிகளுடன் தோளோடு தோள் நிற்கிறது என்றும், அவர்களுக்கான சேவைகளை மேம்படுத்தத் தொடர்ந்து பணியாற்றி வருகிறது என்றும் கூறினார். விவசாயிகளின் முயற்சிகள் மூலம் விவசாய உற்பத்தியை அதிகரித்து, நாட்டின் செழிப்பை புதிய உயரங்களுக்குக் கொண்டு செல்வதே இதன் நோக்கம் என்றும் அவர் மேலும் கூறினார்.
திவாஹர்