மக்களவையில் இன்று கேள்விகளுக்கு பதிலளித்த மத்திய வடகிழக்கு பிராந்திய தகவல் தொடர்பு மற்றும் மேம்பாட்டு அமைச்சர் திரு. ஜோதிராதித்ய எம். சிந்தியா , இந்தியாவின் வேகமாக மாறிவரும் டிஜிட்டல் நிலப்பரப்பு மற்றும் எதிர்காலத் திட்டத்தை எடுத்துரைத்தார். பிரதமர் திரு. நரேந்திர மோடியின் தலைமையில், இந்தியா இனி தொழில்நுட்பத்தைப் பின்பற்றுபவராக இல்லை, மாறாக உலகளாவிய டிஜிட்டல் தலைவராக உருவெடுத்துள்ளது என்று அவர் கூறினார். தகவல் தொடர்பு புரட்சி இனி பெருநகரங்களுடன் மட்டும் நின்றுவிடாது, நாடு முழுவதும் உள்ள கிராமங்களைச் சென்றடைந்து, குடிமக்களின் வாழ்க்கை, கல்வி, சுகாதாரம் மற்றும் வாழ்வாதாரங்களை மறுவடிவமைத்து வருகிறது என்று அவர் வலியுறுத்தினார்.
5G இன் விரைவான விரிவாக்கம் மற்றும் 6G க்கான தொலைநோக்குப் பார்வை
உலகிலேயே மிக வேகமாக 5G சேவையை இந்தியா அறிமுகப்படுத்தியுள்ளதாக மத்திய அமைச்சர் ஸ்ரீ சிந்தியா தெரிவித்தார். வெறும் 22 மாதங்களுக்குள், நாட்டின் 99.9% மாவட்டங்களில் 5G சேவைகள் தொடங்கப்பட்டு, உலகளாவிய அளவுகோலை அமைத்துள்ளன. இந்த விரிவாக்கத்திற்காக தொலைத்தொடர்பு சேவை வழங்குநர்கள் கிட்டத்தட்ட ₹4 லட்சம் கோடி முதலீடு செய்துள்ளனர், நாடு முழுவதும் 5 லட்சத்திற்கும் மேற்பட்ட BTS (Base Transceiver Stations) நிறுவப்பட்டுள்ளன.
தற்போது, 400 மில்லியன் குடிமக்கள் 5G சேவைகளால் பயனடைந்து வருகின்றனர், மேலும் இந்த எண்ணிக்கை 2030 ஆம் ஆண்டுக்குள் 1 பில்லியனாக உயரும் என்று எதிர்பார்க்கப்படுகிறது. இந்தியாவின் எதிர்கால தொலைநோக்குப் பார்வையை கோடிட்டுக் காட்டிய அவர், “இந்தியா 4G இல் உலகைப் பின்பற்றியது, 5G இல் உலகத்துடன் அணிவகுத்தது, மேலும் 6G இல் உலகை வழிநடத்தும்” என்று கூறினார்.
கிராமப்புற வைஃபை விரிவாக்கமும் மகாராஷ்டிராவின் சாதனையும்
டிஜிட்டல் இணைப்பை கடைசி மைல் வரை விரிவுபடுத்துவதற்கான முயற்சிகளை எடுத்துரைத்த மத்திய அமைச்சர் ஸ்ரீ சிந்தியா, வைஃபை நெட்வொர்க்குகளின் விரிவாக்கம் கிராமப்புற இந்தியாவில் ஒரு புதிய புரட்சியை ஏற்படுத்துகிறது என்றார். வைஃபை ஹாட்ஸ்பாட்களைப் பயன்படுத்துவதில் மகாராஷ்டிரா நாட்டின் முன்னணி மாநிலங்களில் ஒன்றாக உள்ளது என்று அவர் குறிப்பிட்டார்.
இந்தியாவில் பிராட்பேண்ட் இணைப்பு ஒரு தசாப்தத்திற்கு முன்பு 60 மில்லியனிலிருந்து இன்று 1 பில்லியனாக உயர்ந்துள்ளது என்று அவர் மேலும் அடிக்கோடிட்டுக் காட்டினார். 2030 ஆம் ஆண்டுக்குள், இந்த டிஜிட்டல் உள்கட்டமைப்பை மேலும் வலுப்படுத்தவும் ஆழப்படுத்தவும் அரசாங்கம் இலக்கு வைத்துள்ளது.
திவாஹர்