விசாகப்பட்டினத்தில் உள்ள பிராந்திய மையத்தின் CSIR-தேசிய கடல்சார் நிறுவனத்தின் (NIO) கடற்கரை அடிப்படையிலான ஆய்வகத்தை மத்திய அறிவியல் மற்றும் தொழில்நுட்பம் மற்றும் புவி அறிவியல் துறை இணையமைச்சர் (தனிப்பொறுப்பு) டாக்டர் ஜிதேந்திர சிங் இன்று திறந்து வைத்தார். மத்திய அரசுக்கும் மாநில அரசுக்கும் இடையிலான தடையற்ற ஒருங்கிணைப்பு வளர்ச்சியை துரிதப்படுத்தும் “இரட்டை இயந்திர அரசாங்க விளைவு” என்பதற்கு இது ஒரு தெளிவான நிரூபணம் என்று அவர் விவரித்தார்.
ஆந்திரப் பிரதேச உள்துறை அமைச்சர் திருமதி அனிதா வாங்கலபுடி, நாடாளுமன்ற உறுப்பினர் திரு. எம். ஸ்ரீபரத், எம்எல்ஏ திரு. ஜி. ஸ்ரீனிவாச ராவ், சிஎஸ்ஐஆர்-என்ஐஓ இயக்குநர் பேராசிரியர் சுனில் குமார் சிங், டாக்டர் விவிஎஸ்எஸ் சர்மா, சிஎஸ்ஐஆர் இயக்குநர் ஜெனரல் டாக்டர் கலைசெல்வி ஆகியோர் முன்னிலையில் நடைபெற்ற கூட்டத்தில் உரையாற்றிய டாக்டர் ஜிதேந்திர சிங், இந்தத் திட்டத்திற்கான அடித்தளம் பல ஆண்டுகளுக்கு முன்பே அமைக்கப்பட்டிருந்தாலும், மத்திய மற்றும் மாநில அரசுகள் ஒரே பக்கத்தில் இணைந்ததைத் தொடர்ந்து கடந்த 8-10 மாதங்களுக்குள் கணிசமான முன்னேற்றமும் நிறைவும் ஏற்பட்டதாகக் கூறினார்.
இந்தத் திட்டத்திற்கான நிலம் 2000களின் முற்பகுதியில் மாநில அரசால் மிகக் குறைந்த விலையில் மாற்றப்பட்டதாகவும், இந்தப் பகுதியில் ஏற்பட்ட விரைவான வளர்ச்சி காரணமாக அதன் தற்போதைய மதிப்பு பல மடங்கு பெருகியுள்ளதாகவும் அமைச்சர் குறிப்பிட்டார். இந்திய அரசு, CSIR சார்பாகவும், CSIR இன் தலைவரான பிரதமர் திரு. நரேந்திர மோடி சார்பாகவும், ₹32 கோடி மதிப்பிலான இந்த கடற்கரை அடிப்படையிலான வசதியை நாட்டிற்கு அர்ப்பணிக்கிறது என்றும் அவர் கூறினார்.
இந்த வசதியின் மூலோபாய முக்கியத்துவத்தை எடுத்துரைத்த டாக்டர் ஜிதேந்திர சிங், இந்தியா கிட்டத்தட்ட 11,000–12,000 கி.மீ கடற்கரையைக் கொண்டுள்ளது என்றும், அதில் 1,000 கி.மீ.க்கு மேல் ஆந்திரப் பிரதேசத்தில் அமைந்துள்ளது என்றும், இது கடல்சார் பொருளாதாரத்திற்கும் பிரதமரின் நீலப் பொருளாதாரக் தொலைநோக்குப் பார்வைக்கும் இயற்கையான மையமாக அமைகிறது என்றும் கூறினார். இந்தியாவின் கிழக்கு கடற்கரை விளிம்பு புவியியல் ரீதியாக வேறுபட்டது மற்றும் ஹைட்ரோகார்பன்கள், கடற்பரப்பு தாதுக்கள், எண்ணெய் மற்றும் இயற்கை எரிவாயு ஆகியவற்றிற்கு குறிப்பிடத்தக்க ஆற்றலைக் கொண்டுள்ளது, இதற்கு பெரும்பாலும் இமயமலை நதி அமைப்புகளிலிருந்து வரும் அதிக வண்டல் படிவுகள் காரணமாகும் என்றும் அவர் கூறினார்.
எஸ். சதிஷ் சர்மா