வடகிழக்கு பிராந்திய மேம்பாட்டுத் துறை அமைச்சர் திரு. ஜோதிராதித்ய எம். சிந்தியா, முதலமைச்சர் டாக்டர் மாணிக் சஹாவுடன் இணைந்து, இன்று வசந்த பஞ்சமியை முன்னிட்டு திரிபுராவில் ₹270 கோடி மதிப்பிலான ஐந்து மேம்பாட்டுத் திட்டங்களைத் தொடங்கி வைத்தனர் மற்றும் ₹95 கோடி மதிப்பிலான மூன்று திட்டங்களுக்கு அடிக்கல் நாட்டினர். இந்தத் திட்டங்கள் பழங்குடியினர் மற்றும் தொலைதூரப் பகுதிகளில் சாலை இணைப்பு, மின்சார அணுகலை மேம்படுத்துதல் மற்றும் வாழ்வாதாரத்தை மேம்படுத்துவதை நோக்கமாகக் கொண்டுள்ளன.
பிரதமர் திரு. நரேந்திர மோடியின் வடகிழக்கு பிராந்தியத்திற்கான தொலைநோக்குப் பார்வைக்கு இணங்க, திரிபுராவைத் இணைக்கப்பட்ட, போட்டித்தன்மை வாய்ந்த மற்றும் நிலையான மாநிலமாக மாற்றுவதற்கான பரந்த முயற்சியின் ஒரு பகுதியாக இந்தத் திட்டங்கள் உள்ளன என்று மத்திய அமைச்சர் எடுத்துரைத்தார். இந்தப் பிராந்தியத்தில் உள்ள அனைத்து மத்திய அமைச்சகங்களின் மொத்த பட்ஜெட் ஆதரவில் (GBS) 10% முதலீடு செய்யும் பிரதமரின் ஆணையின் கீழ், கடந்த பத்தாண்டுகளில் எட்டு வடகிழக்கு மாநிலங்களில் ₹6.5 லட்சம் கோடிக்கு மேல் முதலீடு செய்யப்பட்டுள்ளது. இது உள்கட்டமைப்பு மேம்பாடு, பொருளாதார வளர்ச்சி மற்றும் வேலைவாய்ப்பு உருவாக்கத்தைத் தூண்டியுள்ளது.
கடந்த பத்தாண்டுகளில் திரிபுரா குறிப்பிடத்தக்க முன்னேற்றத்தைக் கண்டுள்ளது. தற்போது சப்ரூம் வரை அகல ரயில் பாதை இணைப்பு உள்ளது, சாலை நீளம் 850 கி.மீட்டரிலிருந்து 1,550 கி.மீட்டராக விரிவடைந்துள்ளது, மேலும் மகாராஜா பீர் பிக்ரம் விமான நிலையம் ஆண்டுதோறும் 3 மில்லியன் பயணிகளைக் கையாளும் வகையில் மேம்படுத்தப்பட்டுள்ளது. வீடுகள், விவசாயம் மற்றும் தொழில்துறையை ஆதரிக்கும் சுமார் 1,000 மெகாவாட் நிறுவப்பட்ட திறனுடன், மாநிலம் மின் உபரியாகவும் மாறியுள்ளது.
திவாஹர்