வருவாய் புலனாய்வு இயக்குநரகம் (DRI), 2025 அக்டோபர் 21 முதல் 23 வரை நடத்தப்பட்ட ஒருங்கிணைந்த பல நாள் நடவடிக்கையின் மூலம், தேசிய தலைநகர் பிராந்தியம் முழுவதும் செயல்படும் ஒரு பெரிய போதைப்பொருள் உற்பத்தி மற்றும் விநியோக வலையமைப்பை வெற்றிகரமாக அகற்றியுள்ளது .
டிஆர்ஐ-க்கு கிடைத்த குறிப்பிட்ட ரகசிய தகவலின் அடிப்படையில், கிரேட்டர் நொய்டாவில் உள்ள உயரமான குடியிருப்பு கட்டிடங்களுக்கு அருகிலுள்ள தனிமைப்படுத்தப்பட்ட பண்ணை வளாகத்தில் அமைந்துள்ள மெத்தம்பேட்டமைன் தயாரிப்பதற்கான ஒரு ரகசிய தொழிற்சாலையை அதிகாரிகள் சோதனை செய்தனர். இந்த சோதனையின் விளைவாக 11.40 கிலோ ஆம்பெடமைன் மற்றும் அதன் உற்பத்திக்கு பயன்படுத்தப்படும் 110.923 கிலோ முன்னோடி இரசாயனங்கள் பறிமுதல் செய்யப்பட்டன.
அதே நேரத்தில், கும்பலின் முக்கிய கையாளுபவர் குருகிராமில் உள்ள அவரது வீட்டில் கைது செய்யப்பட்டார், மேலும் அவரது வசம் இருந்து 1.33 கிலோ ஆம்பெடமைன் பறிமுதல் செய்யப்பட்டது.
விரைவான தொடர் நடவடிக்கையில், மேற்கு டெல்லியில் கடத்தல் பொருட்களை சேமித்து விநியோகிக்க பயன்படுத்தப்பட்டதாக சந்தேகிக்கப்படும் மற்றொரு இடத்தை டிஆர்ஐ அதிகாரிகள் அடையாளம் கண்டனர். அந்த வளாகம் அடர்த்தியான மக்கள் தொகை மற்றும் நெரிசல் நிறைந்த பகுதியில் அமைந்திருந்தது, குறுகிய பாதைகளால் சூழப்பட்டிருந்தது, இது கணிசமான தளவாட மற்றும் பாதுகாப்பு சவால்களை ஏற்படுத்தியது.
இந்த நடவடிக்கையின் போது, அதிகாரிகள் ஏராளமான நபர்களை சந்தித்தனர், அவர்கள் அதிகாரப்பூர்வ நடவடிக்கையைத் தடுக்க முயன்றனர். விரோதப் போக்கு மற்றும் சாட்சியங்களை அழிக்கும் அபாயம் இருந்தபோதிலும், டிஆர்ஐ குழு டெல்லி காவல்துறையின் உதவியுடன், நிதானத்தையும் தந்திரோபாய புத்திசாலித்தனத்தையும் காட்டி, வளாகத்தை வெற்றிகரமாகப் பாதுகாத்து சோதனையை முடித்தது. இந்தத் தேடுதலில் பல கைதுகள் செய்யப்பட்டன, மேலும் 7.79 கிலோ கோகோயின், 1.87 கிலோ ஹெராயின், 3.54 கிலோ ஆம்பெடமைன்; 2 கிலோ கஞ்சா; 0.15 கிலோ மெத்தகுலோன் மற்றும் போதைப்பொருள் பொருட்கள் தயாரிக்கப் பயன்படுத்தப்படும் 4.50 கிலோ முன்னோடி ரசாயனங்கள் மற்றும் போதைப்பொருள் கடத்தலின் மூலம் கிடைத்ததாக சந்தேகிக்கப்படும் ₹37 லட்சம் ரொக்கம் ஆகியவை மீட்கப்பட்டன.
மொத்தத்தில், 16.27 கிலோ ஆம்பெடமைன், 7.9 கிலோ கோகைன், 1.8 கிலோ ஹெராயின், 2.13 கிலோ கஞ்சா மற்றும் 115.42 கிலோ முன்னோடி ரசாயனங்கள் பறிமுதல் செய்யப்பட்டன, இதன் மதிப்பு சர்வதேச சந்தையில் சுமார் ₹108.81 கோடி ஆகும். இந்த நடவடிக்கையின் போது மொத்தம் 26 வெளிநாட்டினர் கைது செய்யப்பட்டுள்ளனர்.
திவாஹர்